ადამიანს მარჯვენა კიდურები აქვს უფუნქციო და ამ მდგომარეობაში შუამდგომლობა კიდევ არ იყოს დაყენებული, არ ვიცი, ამის იქით შეცდომა რა უნდა იყოს დაშვებული, აღნიშნული განცხადება ჭყონდიდის მიტროპოლიტმა, პეტრე ცაავამ ე.წ. ციანიდის საქმეზე მსჯავრდებული სასულიერო პირის შეწყალების საკითხთან დაკავშირებით „ტვ.პირველის" გადაცემაში „პირველები" გააკეთა.

მეუფე პეტრე იმედოვნებს, რომ საპატრიარქოს დეკანოზ გიორგი მამალაძის შეწყალების საკითხზე ადეკვატური დამოკიდებულება ექნება.

„არ ვიცი, რამდენად სასურველია, რომ სინოდი შეიკრიბოს ამ საკითხზე, დღემდე უნდა შეკრებილიყო და მე არაერთხელ მითქვამს, რომ ყოველი დაკარგული დღე ჩვენ წინააღმდეგ მუშაობს და. მე ყოველთვის იმედს ვიტოვებდი, რომ ჯანსაღი აზრი საბოლოოდ გაიმარჯვებს და შემოვა სინათლე და მიიღებენ ადეკვატურ გადაწყვეტილებას. ადეკვატურია, მართლმადიდებლურია და სარწმუნოებრივია და ქრისტიანულია ის დამოკიდებულება, რომ შენი უდანაშაულო მით უმეტეს ადამიანი - ღვთისმსახური, სამი შვილის მამა, ოჯახიც გაუსაძლის მდგომარეობაშია და თვითონ მისი ჯანმრთელობიდან გამომდინარე, ფაქტობრივად, პარალიზებულია. საკმარისია შეცდომები რაც ამ ორი წლის განამვლობაში იქნა დაშვებული", განაცხადა ჭყონდიდის მიტროპოლიტმა.

დეკანოზი გიორგი მამალაძე ციხის საავადმყოფოში გუშინ, 1 მარტს ვანისა და ბაღდათის მიტროპოლიტმა ანტონმა მოინახულა. მეუფე ანტონმა აღნიშნულის შემდეგ ჟურნალისტებთან საუბრისას განაცხადა, რომ „ის იქნება შეწყალებული, მოთხოვნა გაკეთდება - პრეზიდენტი, ვფიქრობ, რომ გადადგამს ამ ნაბიჯს“.