„არ დავუშვებთ, რომ პროკურატურა გვაშანტაჟებდეს, თაროზე არ შემოვადებინებთ ამ საქმეს - ან ბრალი დააყენონ ვინ არის დამნაშავე ამ სიტუაციაში ან საკითხი შეწყვიტონ სასწრაფოდ“, განაცხადა მამუკა ხაზარაძემ პარლამენტში.

„ძალიან მშვენიერ მდგომარეობაში ვარ, ასეთ მდგომარეობაში არასდროს არ ვყოფილვარ იმიტომ, რომ ხმამაღლა ვამბობ სიმართლეს და არ ვლაპარაკობ კულისებში. არ მაინტერესებს როგორც ბიზნესმენს ნულები ანგარიშზე და მოგება, თუ არ იქნება თავისუფლება. თუ იქნება შეზღუდვა, აქ არაფერი არ გამოვა. უნდა არსებობდეს კანონი და არ უნდა იყოს, რომ პროკურატურა გვაშანტაჟებდეს. თუ ეს თაროზე შემოიდება, არ დავთმობთ ერთი წამით და ერთი ნაბიჯით არ წავალთ უკან იმიტომ, რომ ეს პრაქტიკა, საბჭოთა კაგებეშნიკური პრაქტიკა, რომ ვიღაცას ლაფს დაასხამ და მერე მიდის გამოძიება და იდება თაროზე და მერე ადამიანებს არ აქვთ ელემენტარულად იმის საშუალება, რომ პასუხი გასცენ - ან ფინანსური, ან მორალური ან ამბობენ, რომ სახელმწიფოს ვერ მოერევი იმიტომ, რომ ადამიანი ყოველთვის პატარაა, ეს უნდა შეწყდეს. მე პირობას გაძლევთ, ან ბრალი დააყენონ ვინ არის დამნაშავე ამ სიტუაციაში ან საკითხი შეწყვიტონ სასწრაფოდ. თაროზე არ შემოვადებინებთ ამ საკითხს, პირდაპირ გეუბნებით ჩვენ. იმიტომ, რომ ეს არის პირდაპირ დარტყმა გაცილებით მეტზე, რასაც საქართველო და ჩვენი პერსპექტივა ჰქვია“, განაცხადა „თიბისი ბანკის“ დამფუძნებელმა მამუკა ხაზარაძემ პარლამენტში საფინანსო-საბიუჯეტო კომიტეტის სხდომაზე სიტყვით გამოსვლის შემდეგ დეპუტატებისთვის პასუხების გაცემისას.

მან სინანულით აღიარა, რომ ერთ-ერთ კულუარულ შეხვედრაზე მისვლა მოუხდა.

„მე შეცდომა დავუშვი, როცა ერთ-ერთ კულუარულ შეხვედრაზე ვიყავი. თქვენ იცით, რა შეხვედრაზე ვსაუბრობ, ეს იყო წარმოუდგენელი შეხვედრა, რომელსაც ვნანობ, მაგრამ იმ განწყობით მივედი, რომ რაღაცა გადაწყდეს“, განაცხადა ხაზრაძემ.

მანამდე ხაზარაძემ დეტალურად აღწერა „თიბისი ბანკის“ დამფუძნებლების წინააღმდეგ განხორციელებული „ორკესტრირებული შეტევა“.