იუსტიციის მინისტრი თეა წულუკიანი თიბისი ბანკის გარშემო განვითარებულ მოვლენებსა და პროკურატურის მიერ იმ წერილის გასაჯაროვებას ეხმაურება, რომელიც მამუკა ხაზარაძის განცხადებით, შინაგან საქმეთა მინისტრისგან მიიღო. წულუკიანისთვის ღიმილისმომგვრელია ხაზარაძის განცხადება წერილზე, რომელიც მინისტრის თქმითვე, ირკვევა, რომ რეალურად არ მიუღია.

„ამ ხმაურიანმა განცხადებამ კიდევ მეტი არასერიოზულობა შესძინა, სამწუხაროდ, თავად ბატონ ხაზარაძეს და იმ საქმეს, რომელსაც ის თითქოსდა სათავისოდ იცავს. მე პირადად ამას პირველივე განცხადების მომენტიდანვე შევხვდი ღიმილით იმიტომ, რომ მე მახსოვს მაგალითად წარსულში პოლიტიზირებული მოსამართლის, გიორგი პაპუაშვილის განცხადება, თითქოს მე მას ვემუქრებოდი და შემდეგ აღმოჩნდა, რომ მას მის სახლთან მომუშავე მემწვანილე ექმურებოდა. ეს გამახსენდა და გამეღიმა, მერე კიდევ უფრო გამეღიმა, როდესაც აღმოჩნდა, რომ მას არ აქვს წერილი, რაღაც ნაბეჭდი მოიტანა. თუმცა, რა თქმა უნდა, როცა განცხადბება კეთდება, საჭიროა შესწავლა, რეაგირება, მაგრამ სანამ განცხადებას გავაკეთებთ, ყველას გვევალება, რომ სასაცილოდ არ ავიგდოთ თავი", განაცხადა იუსტიციის მინისტრმა ჟურნალისტებთან საუბრისას.

მამუკა ხაზარაძემ რამდენიმე დღის წინ პარლამენტის საფინანსო-საბიუჯეტო კომიტეტის სხდომაზე განაცხადა, რომ გიორგი გახარიასგან მუქარის წერილი მიიღო. აღნიშნული განცხადების შემდეგ, იგი გამოკითხვაზე დაიბარეს. გუშინ, 5 მარტს გამოკითხვიდან გამოსულმა ხაზარაძემ ჟურნალისტებს უთხრა, რომ წარდგინა წერილის ასლი, ხოლო დედანი გადაგზავნილია ლონდონში ექსპერტიზაზე.

მთავარმა პროკურატურამ დღეს წერილი გაასაჯაროვა.