„ნაციონალური მოძრაობიდან" წამოსული ოთხი დეპუტატის შესახებ ყოფილი პრემიერ-მინისტრი ბიძინა ივანიშვილი „გურიანიუსთან" ინტრვიუში საუბრობს და მათ მიერ გადადგმულ ნაბიჯს დადებითად აფასებს. მან ამავე ინტერვიუში საქართველოს ყოფილ პრეზიდენტზეც გააკეთა განცხადება და თქვა" "სააკაშვილს აღარც ვაკრიტიკებ, არც ვკითხულობ მის განცხადებებს."


„პოზიტიურად ვაფასებ მათ ქმედებას. მათ გააცნობიერეს, რომ მათი ქვეყანა საქართველოა და არა სააკაშვილი. ერთ კაცს კი არ უნდა მოემსახურონ, უნდა მოემსახურონ ქვეყანას. ამ მხრივ „ნაციონალურ მოძრაობას", მრავალჯერ მითქვამს, რომ არავითარი პერსპექტივა არ აქვს! ვერასდროს ისინი ხელისუფლებას ვერ დაიბრუნებენ. არ არის საქართველოს მოსახლეობა ისეთი ბრიყვი, როგორიც მათ ჰგონიათ. ერთადერთი კარგი, რაც მათ გააკეთეს, აჩვენეს ის, როგორ ცუდად შეიძლება მოგექცეს საკუთარი ხელისუფლება!  ამ ოთხეულმა დაგვიანებულად შეძლო გამოყოფა. მივესალმები მათ საქციელს. ხალხმა იცის ნაციონალების რეალური სახე. სააკაშვილს აღარც ვაკრიტიკებ, არც ვკითხულობ მის განცხადებებს", - განაცხადა ივანიშვილმა.


კითხვაზე, ხომ არ არის შესაძლებელი საარჩევნოდ ეს გუნდი ივანიშვილის გვერდით აღმოჩნდეს? - ბიძინა ივანიშვილი პასუხობს:

 
„რა პრობლემაა, შევხვდები და ხელს ჩამოვართმევ. არავისზე უარს არ ვამბობ. ყველანი ჩვენი ქვეყნის შვილები არიან. როგორ შეიძლება, პარტიული კუთხით გავიხლიჩოთ? პარტიული ნიშნით როგორ შეიძლება ვინმეს ხელი არ ჩამოართვა? მათ კეთილი ინებონ და საკუთარ ქვეყანას მოემსახურონ. როდესაც ხელისუფლებაში მოვედი, არც მაშინ მსურდა პარტიული ნიშნით დაყოფა.

 
მე ყველა ადამიანთან თანახმა ვარ თანამშრომლობაზე. მე არ ვარ პოლიტიკაში, ამ მხრივ საკითხი გახსნილი მაქვს. როგორც საქართველოს მოქალაქე, ნებისმიერ ადამიანთან ვთანამშრომლობ", - განაცხადა ივანიშვილმა.