რა სიმპათიები და თანადგომა შეიძლება გამოვუხატოთ კალაძეს, იმ კალაძეს, რომელმაც გაზით დახოცა - ჰიტლერი ოსვენციმში ხოცავდა გაზით ხალხს, ამან დედაქალაქში მოაწყო ოსვენციმი, აღნიშნული განცხადება „ლეიბორისტული პარტიის" ლიდერმა გააკეთა.

შალვა ნათელაშვილმა ცოტა ხნის წინ გამართულ ბრიფინგზე არაერთი ქართველი ბიზნესმენი გააკრიტიკა და აღნიშნა, რომ კალაძემ, მათ შორის, მთელი საქართველო ჩაიგდო ხელში და რომ „ქართული ოცნების" გენერალური მდივანი და თბილისის მერი, ბიძინა ივანიშვილის მერე „რეიტინგით მეორეა".

ნათელაშვილი მიიჩნევს, რომ საქართველოს მსხვილ ბიზნესზე დიდი მტერი არ ჰყავს და ამ კონტექსტში, ივანიშვილთან და კალაძესთან ერთად, რამდენიმე ბიზნესმენს, მათ შორის, მამუკა ხაზარაძეს, თოფაძე-ტყემალაძესა და კახა ოქრიაშვილსაც ასახელებს.

„რა განსხვავებაა ბიძინა ივანიშვილსა და მამუკა ხაზარაძეს შორის? ივანიშვილმა მოახდინა პოლიტიკისა და საქართველოს პრივატიზაცია, ხაზარაძემ 30 წელი არაადამიანური საბანკო პროცენტებით ძარცვა ჩვენი ხალხი, გამოასახლა ბინებიდან და დაატოვებინა ქვეყანა. რა განსხვავებაა ამ ორსა და ვანო ჩხარტიშვილს შორის, რომელმაც მიითვისა ჩვენი მილიარდიანი ანაბრები და შემდგომ უკვე დაიწყო სახელმწიფოს მართვა, ფაქტიურად, იყიდა რა, ხელშეუხებელი ციხესიმაგრე ლონდონში. რა განსხვავებაა ამ დასახელებულებსა და თოფაძე-ტყემალაძეს შორის, რომლებიც მოვიდნენ 25 წლის წინ პოლიტიკაში 100 მილიონით და წავიდნენ მილიარდერებად. რა განსხვავებაა ყველა ამ პერსონასა და ოქრიაშვილს შორის, რომელიც ხუთი მოწვევის პარლამენტის დეპუტატია და რომელიც ყოველდღე აძვირებს წამლებს იმ დონეზე, რომ ავადმყოფს მისი ყიდვა აღარ შეუძლია, თუ სახლი არ ჩადო. რა სიმპათია შეიძლება ჩვენ გვქონდეს ტელეკომპანია იმედის დირექტორ რუხაძის მიმართ, რომელსაც აჩუქეს პენსიონერთა ლიბერთი ბანკი და რომელიც პენსიონერების - ჩვენი ბებიებისა და პაპების ძარცვით შოულობს მილიარდებს და მერე ამ ტელევიზიიდან აფრქვევს ათასნაირ სიცრუესა და სიყალბეს. რა სიმპათიები და თანადგომა შეიძლება გამოვუხატოთ კალაძეს, იმ კალაძეს, რომელმაც გაზით დახოცა - ჰიტლერი ოსვენციმში ხოცავდა გაზით ხალხს, ამან დედაქალაქში მოაწყო ოსვენციმი, და რომელმაც მთელი ქვეყნის სიმდიდრე ჩაიგდო ხელში - ივანიშვილის შემდეგ რეიტინგით მეორე....

ეს არის ბანდა და ამ ბანდას გამოასწორებს მხოლოდ მათი პოლიტიკიდან ჯოხით კინწისკვრით გარეკვა. ვისაც ინტერესი აქვს ბიზნესის და ეროვნულობის რაღაც ელემენტი შემორჩენია, ის დაიწყებს სამუშაო ადგილების შექმნას, დაიწყებს გადასახადების გადახდას, დაუწყებს იმის დაბრუნებას, რაც წაიღო..

ესენი ხალხის რისხვას ვერსად გაექცევიან. ხელისუფლება აუცილებლად შეიცვლება და ჩვენ ყველას ძებნაში გამოვაცხადებთ ინტერპოლით. ყველას ანგარიშებს გავყინავთ უცხოეთის ბანკებსა და ოფშორებში. ბოლო თეთრამდე მოვატანინებთ ყველაფერს იმას, რაც წაიღეს და რაც არ იყო მათი საკუთრება. აი, ამ ბანდამ თვითონ გამოჩხრიკა თავისი მკვლელი, თვითონ გააბა საკუთარი თავი მახეში....

მივიღეთ რა? მივიღეთ გაყალბებული არჩევნები; მივიღეთ ის, რომ პარლამენტში არ შეგვიშვეს. ერთი კაპიკი კრედიტი, რაც კანონით გვეკუთვნოდა, არც გასცა არც ხაზარაძემ და არც სხვა ბანკირმა იმიტომ, რომ ეს ივანიშვილმა აუკრძალა. დღეს ივანიშვილი მათ ახრჩობს და დღეს უნდათ, რომ გვერდში დავუდგეთ. არა, ბატონებო, თქვენ ყველანი ივანიშვილის თამადობით, ერთიანად უნდა წახვიდეთ პოლიტიკურ ჯოჯოხეთში", განაცხადა შალვა ნათელაშვილმა.