ნუგზარ და ანა ბაგრატიონ-გრუზინსკები დავით ბაგრატიონ-მუხრანელს სამეფო ოჯახის სახელის უნებართვოდ გამოყენებას ედავებიან. ოჯახი დავით ბაგრატიონ-მუხრანელისთვის საქართველოს სამეფო სახელის გამოყენების აკრძალვას და ზიანის ასანაზღაურებლად სიმბოლურად ერთ ლარს ითხოვს.

საქმეს თბილისის საქალაქო სასამართლოში ხვალიდან სპეციალური, სამი მოსამართლისგან შემდგარი კოლეგია განიხილავს.

„დავის საგანს წარმოადგენს დავით ბაგრატიონ-მუხრანელის მიერ სამეფო სახლის სახელით სარგებლობის აღკვეთა. მას არ აქვს უფლება, რომ საქართველოს სამეფო სახლის სახელით ისაუბროს, განახორციელოს შეხვედრები, შეიყვანოს შეცდომაში საერთაშორისო საზოგადოება. მას აქვს თავის ვებგვერდზე განთავსებული ინფორმაცია, რომ წარმოადგენს ისეთი მეფეების შთამომავალს, როგორიც არის ერაკლე მეორე, ალექსანდრე მეექვსეს, რომელსაც საქართველოს ისტორიაში არავინ იცნობს. ერაკლე მეორე ასოცირდება ერეკლე მეორესთან, რომელთანაც მუხრანელი ბაგრატიონების შტოს არანაირი შეხება არ აქვს. ალექსანდრე მეექვსეს სურათად აკაკი წერეთლის სურათი ჰქონდა განთავსებული, რაც საერთაშორისო საზოგადოებისთვის არის გათვლილი", აცხადებს ნუგზარ და ანა ბაგრატიონ-გრუზინსკების ადვოკატი ლევან გორელაშვილი „რუსთავი 2"-თან საუბრისას.

თავის მხრივ, დავით ბაგრატიონ-მუხრანელის ადვოკატი მოსარჩელე მხარეს თვითმარქვიას უწოდებს და აცხადებს, რომ მას შემდეგ, რაც ნუგზარ ბაგრატიონმა უარი განაცხადა, დნმ-ის ტესტის ჩატარებაზე, გამძაფრდა ეჭვი, რომ ის თვითმარქვიაა.

„მსგავს ტაკიმასხარაობაში მონაწილეობას არ მივიღებთ. რომ არ ყოფილიყო სავალდებულო კანონით, არც ჩავერთვებოდით ამ საქმეში. მათი მიზანი არის ერთადერთი მთავარი - სარჩელი არ არის გათვლილი შედეგზე. მათ სურთ, რაიმე ფორმით საქართველოს სახელმწიფოსგან მიიღონ აღიარება, რომ ისინი არიან რაიმე ფორმით კავშირში საქართველოს სამეფოსთან.

ჩვენ შევთავაზეთ ნუგზარ ბაგრატიონ-გრუზინსკის, ჩაეტარებინა დნმ კვლევა და დაედასტურებინა, რომ ის არის ნამდვილად ბაგრატიონი, რაზეც მან განაცხადა უარი, რაც კიდევ ერთხელ ამძაფრებს ეჭვს, რომ ჩვენ არანაირ ბაგრატიონებთან საქმე არ გვაქვს და საქმე გვაქვს თვითმარქვიებთან", აცხადებს დავით ბაგრატიონ-მუხრანელის ადვოკატი ლევან ჩხეიძე.