პოლიტიკოსმა ვალერი გელბახიანმა განაცხადა, რომ მიხეილ სააკაშვილის მმართველობის 5-6 წელიწადში „უდიდესი ნახტომი“ მოხდა, რამაც ქვეყანა „უდიდეს წარმატებამდე“ მიიყვანა. როგორც მან ტელეკომპანია „კავკასიას“ ეთერში განაცხადა, 2005-დან 2012 წლამდე პერიოდი იყო „ეპოქა, ნახტომი ქართული პოლიტიკური და სახელმწიფო ცხოვრებისთვის“.

„როდესაც უყურებ შევარდნაძის პერიოდს, 2004 წლამდე, 2004-ამდე არა, 2005-ამდე და 2013-დან დღემდე, აი, 2005-დან 2012-ამდე იმხელა ნახტომი მოხდა, ისეთი გარღვევა მოხდა, ფიზიკურ კანონებს გადაასწრო. გზები არა, კომუნიკაციები არა, ინსტიტუციები არა, ფინანსები არა, წესრიგი არა, კორუფცია აყვავებული, აი, მატერიალურ-ტექნიკური ბაზა არსად არაფერი და 5-6 წელიწადში ყველაფერი სახეზეა. 5-6 წელიწადში მოხდა უდიდესი ნახტომი. ახლა, რის ხარჯზე მოხდა, რატომ მოხდა, მოდი, ამას ისტორია გაივლის და არავინ არ მოიკითხავს, მაგრამ ჩვენს ხარჯზე რახან მოხდა, მტკივნეულად გადავიტანეთ. ყველა დიდი, გლობალური მასშტაბის რეფორმა არის ძალიან მტკივნეული, ანუ ის საზოგადოება ვერ ეგუება და ებრძვის ასეთი ტიპის რეფორმებს. ალბათ, ეს რომ დაინახა ამ ხელისუფლებამ, რომ დიდი რეფორმები დიდ ტკივილს იწვევენ, ამიტომ დაანებს თავი რეფორმის გზით სიარულს, მიუშვეს და მივედით ამ ჭაობამდე. შეიძლება ითქვას, რომ ეს იყო ეპოქა, ნახტომი ქართული პოლიტიკური და სახელმწიფო ცხოვრებისთვის. მე არ ვიცი ვის რა ახსოვს, მაგრამ იგივე სასამართლოში რომ შეხვიდოდი, შეიძლება ფეხი ჩაგვარდნოდა გატეხილ იატაკზე და მოგტეხოდა, ახლა გაწკრიალებულია. პოლიცია დადიოდა ძველი ვილისებით, თუ გახსოვთ, ფორმა არ ეცვა, ცალ ფეხზე ერთი ბათინკი ეცვა, ცალ ფეხზე მეორე, შუქი არ იყო. ეს პერიოდი ნახტომით გავიარეთ. ჩვენ გამოვტოვეთ გარდამავალი ეტაპები და პირდაპირ ნახტომით გადავედით უდიდეს წარმატებამდე“, განაცხადა ვალერი გელბახიანმა.