კომპანია „ფრესკოს დამფუძნებლის“, ვასილ სოფრომაძის ვიდეო განცხადების გამოქვეყნების შემდეგ, სადაც ხელისუფლების მხრიდან კომპანიაზე განხორციელებულ ზეწოლასა და ფინანსთა სამინისტროს წამყვანი თანამშრომლების მიერ „ფრესკოს“ სუპერმარკეტებში ქურდობისა და იარაღის გამოყენებით მუქარებზეა საუბარი - კომპანია „ფრესკო“ აცხადებს, რომ „სრული ინფორმაცია და ვიდეო მასალა გადაცემულია შინაგან საქმეთა სამინისტროზე“.

„არასდროს არ ვაფარებთ არც ერთ დანაშაულს ხელს. მათ შორის კომპანიის დამფუძნებლის მიერ ვიდეოში ნახსენებ ქურდობებზე, კანონის ფარგლებში იმავე დღეს მოხდა მყისიერი რეაგირება - სრული ინფორმაცია და ვიდეო მასალა გადაცემულია შინაგან საქმეთა სამინისტროზე ფაქტის მომხდარის დღესვე“, აღნიშნულია „ფრესკოს“ ოფიციალური „ფეისბუქის“ გვერდზე გამოქვეყნებულ ინფორმაციაში.

სოფრომაძე ვიდეო მიმართვაში სკანდალურ ინფორმაციას ავრცელებს. იგი დაჟინებით ირწმუნება, რომ ფინანსთა სამინისტროს თანამშრომლები და ამ უწყების დეპარტამენტების წამყვანი სპეციალისტები „ფრესკოს“ მაღაზიებში პროდუქტებს იპარავენ და „ატრიალებენ იარაღს ჩვენი დაცვის თანამშრომლებზე, ახალგაზრდა გოგოების წინაშე, თქვენი თანამშრომლები, დაცვის თანამშროლები“. სოფორმაძე სამთავრობო უწყებას, რომელიც „ფრესკოს“ ფინანსურ დარღვევებს ედავება, ეკითხება: „გინდათ დაგიდოთ ეს ყველაფერი?...“