რუსეთმა საზღვაო დოქტრინის განახლებული რედაქცია დაამტკიცა, რომელშიც ძირითადი აქცენტი ნატო-ს აღმოსავლეთით გაფართოების მიმართულებაზე არის გაკეთებელი. ამის შესახებ "როიტერსი" იუწყება.


ვიცე-პრემიერის, დიმიტრი როგონიზის განცხადებით, მთავრი მიზეზი, თუ რატომაც ხდება 2001 წელს მიღებულ "საზღვაო დოქტრინაში" ცვლილებების შეტანა, ისაა, რომ "საერთაშორისო ურთიერთობებში ცვლილებები მოხდა" და რუსეთი გაძლიერდა, როგორც საზღვაო სახელმწიფო.


ფრეგატზე - "საბჭოთა კავშირის ფლოტის ადმირალი გორშკოვი" - გამართულ თათბირზე, სადაც ახალი დოქტრინა განიხილეს, ვლადიმერ პუტინმა თქვა, რომ დოქტრინაში პირველად არის შესული სოციალური ხასიათის საკითხები - საზღვაო მედიცინა, მეზღვაურების ჯანმრთელობის მდგომარეობის გაუმჯობესება და სხვა.


შეხვედრაში მონაწილეობა რუსეთის თავდაცვის მინისტრმა სერგეი შოიგუმ, ვიცე-პრემიერმა დიმიტრი როგოზინმა, სამხედრო-საზღვაო ფლოტის მეთაურმა ვიქტორ ჩირკოვმა და დასავლეთის სამხედრო ოლქის ხელმძღვანელმა ანატოლი სიდოროვმა მიიღეს.


როგოზინის თქმით, დოქტრინა 4 ფუნქციონალურ და 6 რეგიონულ მიმართულებას მოიცავს და ძირითადი აქცენტები გაკეთებულია არქტიკასა და ატლანტიკურ მიმართულებებზე.


"ამის მიზეზი შემდეგია: ატლანტიკური, იმიტომ, რომ ბოლო პერიოდში ჩრდილოატლანტიკური ალიანსის ძალიან აქტიური განვითარება და მისი ჩვენს ნაპირებთან მოახლოება მიმდინარეობს, რაზეც, ბუნებრივია, რუსეთის ფედერაცია პოულობს თავის პასუხს. მეორე ფაქტორი კი ყირიმისა და სევასტოპოლის შემოერთებას უკავშირდება. რაც შეეხება არქტიკას, იზრდება ჩრდილოეთის ზღვის მნიშვნელობა, მოგეხსენებათ, ჩვენ ახალ ატომურ ყინულმჭრელთა ფლოტს ვაშენებთ. 2017, 2019 და 2020 წლებში სამი ახალი ატომური ყინულმჭრელი შეუდგება მუშაობას. გარდა ამისა, არქტიკა ჩვენთვის არის თავისუფალი გასასვლელი ატლანტიკურ და წყნარ ოკეანეებში", - განაცხადა როგოზინმა.