საპარლამენტო უმრავლესობის ყოფილი წევრი, დამოუკიდებელი დეპუტატი ეკა ბესელია ქვეყნის პირველ კანონმდებელსა და მის ყოფილ თანაგუნდელ ირაკლი კობახიძეს აფრთხილებს, რომ მისი მისამართით განხორციელებულ ყველა შეტევას მწვავე პასუხს გასცემს.

„მებრალება, გავიმეტო იმ ყველაფრისთვის, რისი ღირსიც არის. ის სცენა კიდევ უფრო მძიმე იყო, ვიდრე ჩვეულებრივი ბოდიშის მოხდა. თუ ენას არ გააჩერებს და კიდევ უფრო შორს წავა, მომიწევს კიდევ უფრო მეტი დეტალის ახსნა და არა მგონია, რომ მისთვის ეს სასიამოვნო იყოს. ამიტომ, ბევრჯერ გავაფრთხილე და კიდევ ერთხელ ვაფრთხილებ მასაც და სხვებსაც - მე მიწევს პასუხების გაცემა, მე არ ვარ თავდამსხმელი, მე არ ვიწყებ პირველად ამაზე საუბარს, მაგრამ როგორც კი, თავს უფლებას მისცემენ და გაბედავენ ღირსებისარმქონე და მორალური უპირატესობის დაკარგვის მიუხედავად, შეტევაზე გადმოსვლას, ჩემი პასუხები იქნება ძალიან მწვავე", განაცხადა ეკა ბესელიამ „ტვ. პირველის" პირდაპირ ეთერში.

მანვე „კობახიძესაც და სხვებსაც" სასამართლოს თემაზე სპეკულაციებისთვის, ხოლო კობახიძეს „პოლიტიკური ჭინთვებისთვის" თავის დანებება ურჩია.

ბესელიას აღნიშნულ განცხადებამდე ერთი დღით ადრე, ირაკლი კობახიძემ იურიდიულ საკითხთა კომიტეტის ყოფილი თავმჯდომარე საზოგადოების შეცდომაში შეყვანის მცდელობაში დაადანაშაულა.

„სამწუხაროდ, ძალიან ბევრი ტყუილი ისმოდა კონკრეტული ადამიანების მხრიდან  - ერთ-ერთი არის ის, რომ თითქოს მე ვლობირებდი მოსამართლეთა სიას. მათ შორის, ტყუილი ითქვა იმასთან დაკავშირებით, რომ თითქოს მე ვაიძულებდი ეკა ბესელიას, ჩაენიშნა კომიტეტის სხდომა პარასკევისთვის. საერთოდ სხვა მოვლენები ვითარდებოდა პარტიაში ამასთან დაკავშირებით.... როდესაც ამ სიტუაციაში, შენს გადადგომას უკავშირებ იმას, რომ თითქოს ვიღაც გაიძულებდა შენ გინდა თუ არა მოსამართლეთა საკითხის გატანას პლენარულ სხდომაზე, ეს არის მხოლოდ და მხოლოდ საზოგადოების შეცდომაში შეყვანის მცდელობა", განაცხადა პარლამენტის თავმჯდომარემ „რუსთავი 2"-ის გადაცემაში „არჩევანი" სტუმრობისას.