ოკუპირებულ გალში გარდაცვლილი ირაკლი კვარაცხელიას ცხედარს ექსპერტიზა ჩაუტარდა. სამხარაულის ეროვნულ ბიუროში ექსპერტიზა 5 საათზე მეტხანს მიმდინარეობდა.

ექსპერტი ირაკლი თოიძე აცხადებს, რომ ცხედარს ყელზე უმნიშვნელო ნაჭდევები აქვს.

„არის თოკის ჩანართები, მეტი დაზიანებები ფაქტიურად არ არის და დამატებითი გამოკვლევების შემდეგ დადგინდება რაღაცეები. მართალია, გვამი უკვე ლპობაშია, მაგრამ დადგინდება - დასკვნა დაიწერება. შინაგანი ორგანოები შიგ ჩაბრუნებული იყო და ლაბორატორიული გამოკვლევებისთვის წაღებული იქნა. დაზიანებები რაც იყო ყელზე უმნიშვნელო ნაჭდევები იყო. ეს სიცოცხლის დროინდელია თუ სიკვდილის შემდეგ განვითარებული მაგაზე ლაბორატორიული კვლევებისთვის აღებული იქნა ნაჭრები", აცხადებს ექსპერტი ირაკლი თოიძე.

კვარაცხელიას თვითმკვლელობის ვერსიას, რაზეც ოკუპირებული გალის დე ფაქტო ხელისუფლება საუბრობს, გამორიცხავენ ოჯახის ახლობლები.

„არ გვაქვს ინფორმაცია რატომ იყო გადასული ან დადიოდა თუ არა. გალში არავინ არ გადავიდოდა, რომ ჩაედინა თვითმკვლელობა, ეს თავიდანვე გამორიცხულია, ყოვლად მიუღებელი არგუმენტია", აცხადებს ირაკლი კვარაცხელიას ნათესავი, თეა გოგინავა.

ტელეკომპანია „რუსთავი 2" ავრცელებს ინფორმაციას, რომლის მიხედვითაც, კვარაცხელია რუსმა ჯარისკაცებმა დაკითხვისას ელექტროშოკით აწამეს, რა დროსაც მას გულის შეტევა მოუვიდა. 

ოკუპირებულ გალის რაიონში დე ფაქტო ხელისუფლების მიერ დაკავებული საქართველოს მოქალაქის, ირაკლი კვარაცხელიას გარდაცვალების შესახებ ინფორმაცია საქართველოს სახელმწიფო უსაფრთხოების სამსახურმა 12 მარტს, საღამოს გაავრცელა.

სუს-ის მიერ გავრცელებული ინფორმაციით, ევროკავშირის სადამკვირვებლო მისიის ფარგლებში მოქმედი ცხელი ხაზით, დე ფაქტო აფხაზეთის წარმომადგენლების მხრიდან გაზიარებული ინფორმაციის თანახმად, ოკუპირებული გალის რაიონში ადგილი ჰქონდა 1990 წელს დაბადებული, ირაკლი თამაზის ძე კვარაცხელიას თვითმკვლელობის ფაქტს.

მოწოდებული ინფორმაციის თანახმად, ირაკლი კვარაცხელია დე ფაქტო ხელისუფლების მიერ იყო დაკავებული.

ირაკლი კვარაცხელიას ცხედარი ოკუპირებული ტერიტორიიდან ზუგდიდის მუნიციპალიტეტში გუშინ, 13 მარტს გადმოასვენეს, ექსპერტიზის შემდეგ კი, სენაკში საკუთარ სახლში გადაასვენეს.