ოკუპირებული გალის რაიონში საქართველოს მოქალაქის გარდაცვალებას „ლეიბორისტული პარტიის" ლიდერი ეხმაურება. შალვა ნათელაშვილმა ცოტა ხნის წინ გამართულ საგანგებო ბრიფინგზე განაცხადა, რომ ოთხოზორიას, ტატუნაშვილისა და ბაშარულის შემდეგ, ოკუპანტებმა და სეპარატისტებმა ირაკლი კვარაცხელია მოკლეს.

„საქართველოში გრძელდება ქართველთა გენოციდი. სამშობლოში გადაადგილებისთვის მოკლულ ტატუნაშვილს, ოთხოზორიასა და ბაშარულს შეემატა დღეს უკვე 29 წლის ირაკლი კვარაცხელია, რომელიც ოკუპანტებმა და სეპარატისტებმა მოგვიკლეს", განაცხადა შალვა ნათელაშვილმა, რომელსაც მიაჩნია, რომ „ივანიშვილის რეჟიმი გენოციდის თანამონაწილე ხდება ოკუპანტებთან ერთად".

„არავითარი რეაქცია - დუმილი და ხელშეწყობა იმისა, რაც ხდება. მე კატეგორიულად მოვითხოვ - შეიარაღებული ძალები განლაგდნენ დაპირისპირების ხაზზე დაუყოვნებლივ; საქართველოს მოქალაქაზე ნებისმიერი ხელყოფის შემთხვევაში, გაიხსნას ცეცხლი; შეწყდეს ელექტროენერგიით რუსეთის სამხედრო ბაზების მომარაგება, რომელსაც საქართველოს მთავრობა ახორციელებს და რომლის ფულსაც ჩვენი ჯიბიდან ვიხდით; აიკრძალოს იმ რუსი ბიზნესმენების საქმიანობა საქართველოში, რომლებმაც დააფინანსეს ოკუპანტ-სეპარატისტები და დაედოს ყადაღა მათ საბანკო ანგარიშებს. თუ ამას არ გააკეთებს ივანიშვილი, მის საბრალდებო დასკვნას შეემატება ქართველთა წინააღმდეგ რუსეთთან ერთად გენოციდში მონაწილეობა და ეს მოხდება ძალიან მალე. ალბათ, დედამიწის ზურგზე ვერ ნახავთ პრეცედენტს, როდესაც ოკუპანტი ყოველდღე ღობავს, ჰყოფს, იტაცებს, კლავს მშვიდობიან ადამიანებს, შლის სახელმწიფოს და იმ სახელმწიფოს მთავრობა არის სრულ ჰარმონიაში გენოციდის ავტორთან", განაცხადა შალვა ნათელაშვილმა და დასძინა: „საქართველოს მთავრობისგან ძალიან მალე უნდა გავთავისუფლდეთ და ეს იქნება დეოკუპაციის დასაწყისი".