„რესპუბლიკური პარტიის" ერთ-ერთი ლიდერი დავით ბერძენიშვილი აცხადებს, რომ ბიძინა ივანიშვილი ირაკლი ალასანიას დაკავებას გეგმავდა.

„ის ლაპარაკობდა ირაკლი ალასანიას სისხლის სამართლის პასუხისმგებლობაზე. მას ჰქონდა გადაწყვეტილი ირაკლი ალასანიას ჩამოშორება", ამბობს ბერძენიშვილი და ამატებს, რომ ალასანია ვერ დააკავეს, რადგან დანაშაული არ ჩაუდენია.

ბერძენიშვილი დეტალურად იხსენებს უმრავლესობის იმ სხდომას, რომელზეც ივანიშვილს ალასანიას წინააღმდეგ დეპუტატებმაც აუბეს მხარი. „რესპუბლიკელის" თქმით, მათგან განსხვავებული პოზიცია მხოლოდ თეა წულუკიანს ჰქონდა.

„შეტევა იყო ირაკლი ალასანიაზე, მაშინ ბიძინა ივანიშვილი ამბობდა და უმრავლესობის სხდომაზეც თქვა, რომ ერთი-ორი კაცი თუ დარჩება მასთან ერთად, თორემ დანარჩენები არ დარჩებიანო, მაგრამ დარჩნენ. ნინო გოგუაძეზე იყო ძალიან გაბრაზებული იმიტომ, რომ ეიმედებოდა ნინო გოგუაძე. ბიძინა ივანიშვილს არ შეუძლია პარტნიორობა. მას შეუძლია მარტო პატრონობა და ის კომფორტულად გრძნობს თავს მხოლოდ ყმებთან ურთიერთობაში. არ ვეყმეთ ჩვენ, არ ეყმო ირაკლი ალასანია.

აქ არის კორუფცია, ეს იყო მისი სიტყვა, აქ არის დანაშაული და ირაკლი ალასანიამ ეს მოძებნა ფორმად და იმიტომ მიდის ოპოზიციაში, რომ პოლიტიკას შეაფაროს თავიო. ის ლაპარაკობდა ირაკლი ალასანიას სისხლის სამართლის პასუხისმგებლობაზე. მას ჰქონდა გადაწყვეტილი ირაკლი ალასანიას ჩამოშორება. ეს მისი სტილია. არ დაუშავებია, ვერ დაუმტკიცეს ალასანიას დანაშაული. ამ სხდომას ესწრებოდა მაშინ ჯერ კიდევ „თავისუფალი დემოკრატი“ იუსტიციის მინისტრი, თეა წულუკიანი. თეა წულუკიანმა არ მოიწონა დეპუტატების გამოსვლა, პირდაპირ ბიძინას არ დაუპირისპირდა, მაგრამ მან ის პოზიცია გამოხატა, მაგრამ იმ დეპუტატებს, რომლებიც აყვნენ ბიძინა ივანიშვილს და კორუფცია, კორუფცია იძიეს, იმათ უთხრა, რომ მე არ ვიცი მინისტრმა და თქვენ საიდან იცით მასალებიო", აცხადებს დავით ბერძენიშვილი.