საქართველოს ეკონომიკისა და მდგრადი განვითარების სამინისტროს მხარდაჭერით, ფშავ-ხევსურეთის და გუდამაყრის სათემო ინტერნეტიზაციის პროექტი დაიწყო. პროექტის ფარგლებში ფშავის, ხევსურეთის, არხოტის, შატილის, არდოტისა და გუდამაყრის ხეობები ინტერნეტით დაიფარება. პროექტით განსაზღვრული სიკეთით ჯამში 76 სოფლის 1291 მუდმივი მცხოვრები (496 ოჯახი) და 4 საშუალო სკოლა ისარგებლებს. ასევე, მოეწყობა ფიქსირებული IP სატელეფონო ქსელი 50 აბონენტისთვის.

ხელშეკრულება ფშავ-ხევსურეთის და გუდამაყრის სათემო ინტერნეტიზაციის პროექტის სახელმწიფოს მხრიდან დაფინანსების შესახებ ტექნოპარკში გაფორმდა. დოკუმენტს ხელი ეკონომიკისა და მდგრადი განვითარების სამინისტროს სსიპ „ინოვაციების და ტექნოლოგიების სააგენტოს“ თავმჯდომარემ ავთანდილ კასრაძემ და „მთის სათემო ორგანიზაციის“ აღმასრულებელმა დირექტორმა ჯემალ დამაცალაშვილმა მოაწერეს.

ღონისძიებას მცხეთა-მთიანეთის სახელმწიფო რმწუნებული შალვა კერესელიძე, ეკონომიკისა და მდგრადი განვითარების მინისტრის მოადგილესთან ლაშა მიქავასთან და საქართველოს პრემიერ-მინისტრის მრჩეველთან რეგიონულ საკითხებში სოზარ სუბართან ერთად დაესწრო.

„ინტერნეტიზაციის პროექტი მთიანი დასახლებების გაძლიერების მიზნით სახელმწიფოს კიდევ ერთი წინ გადადგმული ნაბიჯია. პროექტი ხელს შეუწყობს ფშავის, ხევსურეთისა და გუდამაყრის გამოცოცხლებას, ამ ულამაზეს ხეობებში ტურისტული ნაკადების ზრდას და რაც ყველაზე მნიშვნელოვანია, ადგილობრივი მოსახლეობის მშობლიურ სოფლებში დაბრუნებას“ - აღნიშნა მცხეთა-მთიანეთის სახელმწიფო რწმუნებულმა შალვა კერესელიძემ.

ინფორმაციას მცხეთა-მთიანეთის სამხარეო ადმინისტრაცია ავრცელებს.