პარლამენტის იურიდიულ საკითხთა კომიტეტის სხდომაზე, სადაც უზენაესი სასამართლოს მოსამართლების შერჩევის კრიტერიუმების საკითხს განიხილავენ, საპარლამენტო უმრავლესობის ყოფილ წევრს, დამოუკიდებელ დეპუტატ ეკა ბესელიასა და ამავე კომიტეტის თავმჯდომარის მოადგილეს, დავით მათიკაშვილს შორის სიტყვიერი დაპირისპირება მოხდა.

მათიკაშვილმა, რომელიც კომიტეტის სხდომას ხელმძღვანელობს, ბესელიას მოუწოდა, კითხვების დასმისას რეგლამენტით გათვალისწინებულ დროში ჩატეულიყო.

„მე საქმიანად ვსაუბრობ და დროსაც დავზოგავ, მაგრამ იმდენი დრო უნდა გამოიყოს, რამდენიც არის კანონით გათვალისწინებული", განაცხადა ეკა ბესელიამ, რომელმაც მათიკაშვილს სთხოვა, რომ სიტყვა აღარ გაეწყვეტინებინა.

„კომიტეტი მიჰყავს კომიტეტის თავმჯდომარეს ან მისი მოვალეობის შემსრულებელს, ის განსაზღვრავს რეგლამენტს და აძლევს სიტყვას მომხსენებელს, გისმენთ", მიმართა ბესელიას მათიკაშვილმა.

იურიდიული კომიტეტის ყოფილმა თავმჯდომარემ კომიტეტის თავმჯდომარის მოადგილეს სიმშვიდის შენარჩუნებისკენ მოუწოდა.

„ახლა თუ კიდევ გააგრძელებ ხელის შეშლას, მომიწევს რაღაცები შეგახსენო და რეგლამენტის პროცედურები გაგაცნო. გავანებოთ თავი ჭკუის სწავლებას, მაგ როლიდან ლაპარაკს ცოტა მეტი წინდახედულება უნდა და თუ დროს დამაკარგინებ, კიდევ მეტი დრო დაიკარგება, დაწყნარდი, დამშვიდდი და დამაცადე. კომიტეტს აქვს 5 კვირა და თუ ძალიან არ სულსწრაფობთ ნებისყოფა გეყოფათ, მომისმინე, დინჯად მოიქეცი ცოტა და მომისმინეთ", მიმართა ბესელიამ მათიკაშვილს.