„ერთიანი ნაციონალური მოძრაობის" ერთ-ერთი ლიდერი გრიგოლ ვაშაძე ეხმაურება მიხეილ სააკაშვილს, რომელიც აცხადებს, რომ „იმ ფონზე, როდესაც ივანიშვილი მას „არ უშვებს ქვეყანაში და „ზოგიერთი ჩვენი ლიდერი არის ციხეში... მნიშვნელოვანია „ნაციონალური მოძრაობის“ თავმჯდომარის არჩევა“, რადგან პარტიას „ადგილზე ლიდერი“ სჭირდება".

სააკაშვილს, რომელმაც საკუთარ განცხადებაში პარტიის წევრებსა და მხარდამჭერებს მოუწოდა პარტიის თავმჯდომარედ გრიგოლ ვაშაძე აირჩიონ, ვაშაძე ნდობისთვის მადლობას უცხადებს და ამბობს, რომ დელეგატებმა უნდა მიიღონ გადაწყვეტილება, ვინ იქნება პარტიის ახალი თავმჯდომარე.

ვაშაძის თქმით, საუბაირ იმაზე, რომ სააკაშვილი პარტიიდან მიდის, „სისულელეა". მისი განცხადებით, პარტიის ლიდერმა „ყველაზე სწრაფად შეიგრძნო, რომ პარტიას სჭირდება უფრო ეფექტური მართვის სისტემა".

„უკვე მომესმა რომ მიხეილ სააკაშვილი პარტიიდან მიდის და მსგავსი სისულელეები, მაპატიეთ ამ სიტყვისთვის, მიხეილ სააკაშვილი ამ პარტიის დამფუძნებელია, ამ პარტიის ლიდერია და ყველა ის ცვლილება, რაც ამ პარტიაში ხორციელდება მისი ინიციატივით ხდება იმიტომ, რომ იმ მძიმე პოლიტიკურ პერიოდში, რომელშიც ახლა ჩვენ შევდივართ, პარტიას სჭირდება გაცილებით უფრო ეფექტური მართვის სისტემას და ეს პარტიის ლიდერმა შეიგრძნო ყველაზე სწრაფად“, განაცხადა გრიგოლ ვაშაძემ.