„ნაციონალურ მოძრაობას" ნუ გვახსენებს ის ხალხი, „ნაციონალური მოძრაობის" დროს მაგიდის ქვეშ რომ იმალებოდა", ასე მიმართა საპარლამენტო უმრავლესობის ყოფილმა წევრმა, დამოუკიდებელმა დეპუტატმა ეკა ბესელიამ ყოფილ თანაგუნდელებს პარლამენტის პლენარულ სესიაზე.

ბესელიამ საპარლამენტო უმრავლესობა და საკანონმდებლო ორგანოს ხელმძღვანელი პირი მწვავედ გააკრიტიკა და „ყალბი პათეტიკით საუბრისთვის" თავის დანებებისკენ მოუწოდა.

იურიდიულ საკითხთა კომიტეტის ყოფილი თავმჯდომარე დიასპორისა და კავკასიის საკითხთა კომიტეტის თავმჯდომარეობიდან ზვიად კვაჭანტირაძის გადაყენების საკითხს გამოეხმაურა და აღნიშნა, რომ იმის ნაცვლად, რომ „პარლამენტის თავმჯდომარე გამოდიოდეს, მის კოლეგას, რომელსაც მასზე დიდი ხნის გამოცდილება აქვს საპარლამენტო მუშაობის, საპარლამენტო უმრავლესობის ლიდერი იყო, ნაცვლად იმისა, რომ უთხრა - კოლეგიალობის, ქართული ზრდილობის ბოლობოლო - მადლობა, რომ ამ პროცესში გააკეთეთ თქვენ ბევრი რამ ქვეყნისთვის, ამის ნაცვლად, ტრიბუნასთან დადგა პარლამენტის ღირსეული თავმჯდომარე და თქვა, რომ ცუდად მუშაობდაო".

„ვინც თანამდებობის გამო სახე დაკარგა იმ ჩემს ყოფილ პარტიაში და დაამსგავსა ეს პარტია თანამედროვე „შარიკოვებს“, ძალიან ვუსამძიმრებ ყველა იმ ადამიანს.... რას დაამსგავსეთ ეს პარლამენტი, ან ეს ქართული რეალობა და ეს პოლიტიკა? ყალბი პათეტიკით ლაპარაკს და რეპლიკებს თავი დაანებეთ. „ნაციონალურ მოძრაობას“ ნუ გვახსენებთ ის ადამიანები, ვინც „ნაციონალური მოძრაობის“ დროს მაგიდის ქვეშ იმალებოდით, აქ ნუ ვაჟკაცობთ, იქ გევაჟკაცათ, აქ ნუ იყურებით მუსკულებზე", მიმართა ეკა ბესელიამ ყოფილ თანაგუნდელებს.