მას შემდეგ, რაც დიასპორისა და კავკასიის საკითხთა კომიტეტის თავმჯდომარის პოსტიდან ზვიად კვაჭანტირაძის გადაყენება ხმების ნაკლებობის გამო საპარლამენტო ურავლესობამ დღევანდელ სესიაზე ვერ შეძლო, „ქართული ოცნების“ რიგებიდან ახლახან წასულმა დეპუტატმა თქვა, რომ დღის ბოლომდე „თავისი ნებით გადადგება ამ თანამდებობიდან“.

ზვიად კვაჭანტირაძის თანამდებობიდან გადაყენების მომხრე 67 დეპუტატი აღმოჩნდა, 8 წინააღმდეგი წავიდა. კვორუმისთვის 76 ხმა იყო საჭირო და ამრიგად, დიასპორისა და კავკასიის საკითხთა კომიტეტის თავმჯდომარის პოსტიდან კვაჭანტირაძის გადასაყენებლად საპარლამენტო უმრავლესობას 10 ხმა დააკლდა იმის მიუხედავად, რომ პარლამენტის თავმჯდომარე ირაკლი კობახიძე აცხადებდა, რომ საკითხი პარტიის თავმჯდომარესთან, ბიძინა ივანიშვილთან იყო შეთანხმებული და კვაჭანტირაძის ბექა ოდიშარიათი ჩანაცვლების წინადადებას მხარს უმრავლესობის სრული შემადგენლობა უჭერდა.

ირაკლი კობახიძემ დღეს პარლამენტში გამოსვლისას ზვიად კვაჭანტირაძის დიასპორისა და კავკასიის საკითხთა კომიტეტის თავმჯდომარის პოსტზე გაწეული საქმიანობა უარყოფითად შეაფასა, რასაც ამ უკანასკნელის მხრიდან პარლამენტის სპიკერის მიმართ მძაფრი კრიტიკა მოჰყვა.

ზვიად კვაჭანტირაძემ კენჭისყრის შემდეგ ჟურნალისტებთან კომენტირებისას კობახიძის გამოსვლას „ყოვლად უსირცხვილო“ უწოდა და თქვა, რომ დღეს აშკარა გახდა, რომ „პრაქტიკულად „ქართულ ოცნებას“ უმრავლესობა საქართველოს პარლამენტში აღარ აქვს“.

„პარლამენტის თავმჯდომარის ყოვლად უსირცხვილო გამოსვლამ და იმ პოსტულატებმა, რომელიც მან მის ისტორიულად სამარცხვინო გამოსვლაში წამოაყენა, მე მიმაღებინა გადაწყვეტილება ბოლომდე ვმდგარიყავი მედგრად და არც ერთ შემთხვევაში არ გამეკეთებინა განცხადება გადადგომის თაობაზე. თქვენ დღეს დაინახეთ, რომ პრაქტიკულად „ქართულ ოცნებას“ უმრავლესობა საქართველოს პარლამენტში აღარ აქვს იმიტომ, რომ მიუხედავად ძალიან დიდი პრესისა, რომელიც ჩემმა მეგობრებმა, ჩემმა ყოფილმა თანამებრძოლებმა განიცადეს, დღეს დილიდან, გუშინ საღამოდან... სპეციალურად ჩამოიყვანეს ბიძინა ივანიშვილი, დაასწრეს სხდომას უმრავლესობის, რომ შეექმნათ ანტურაჟი, რომ ბატონი ბიძინა ივანიშვილიც აუცილებლად ითხოვდა ჩემი საკითხის ამგვარად გადაწყვეტას. მიუხედავად იმისა, რომ მე დღეს პრაქტიკულად ვაჩვენე სახე აი ამ მმართველობის ქვეშ, რა დღეშია „ქართული ოცნება“ და უმრავლესობა, მე რა თქმა უნდა მაინც მივიჩნევ, რომ ამ სესიის ბოლომდე ჩემი ნებით გადავდგები ამ თანამდებობიდან“, განაცხადა ზვიად კვაჭანტირაძემ.