სტატისტიკური მონაცემები მძიმე დანაშაულის ნაწილში არის პოზიტიური, აღნიშნული განცხადება ქვეყანაში კრიმინოგენული ვითარების შეფასებისას შინაგან საქმეთა მინისტრმა გააკეთა.

როგორც ქვეყნის პირველმა პოლიციელმა ჟურნალისტებთან საუბრისას თქვა, სტატისტიკის მიხედვით, გარკვეული ზრდაა ისეთი დანაშაულების ნაწილში, როგორიც არის ქურდობა, ოჯახში ძალადობა, მუქარა და ა.შ.

გიორგი გახარია ამბობს, რომ შსს და ქართული პოლიცია „პრინციპულად აკონტროლებს ყველაფერს, რაც ხდება ჩვენს ქუჩებში და ასევე დანაშაულის მიმართულებით" - „შსს უზრუნველყოფს მართლწესრიგს ამ ქვეყანაში და შესაძლებლობას, რომ თითოეულმა მოქალაქემ იშრომოს თავისი ოჯახის საკეთილდღეოდ". 

„ზუსტად ერთი წლის წინ, როდესაც ჩვენ მივედით შინაგან საქმეთა სამინისტროში, სრული პასუხისმგებლობით და ზუსტად ვიცოდით, რა მოყვებოდა ამას. ვთქვით, რომ იმისთვის, რომ პრობლემა მოგვაგვაროთ, ეს პრობლემა ობიექტურად უნდა შევაფასოთ. და სწორედ ამიტომ, ავიღეთ ვალდებულება და მაშინ ბევრი არ იჯერებდა ამას, რომ პირველი რასაც გავაკეთებდით, ეს იქნებოდა სტატისტიკის სრულყოფილი გამოქვეყენება, რაც დავიწყეთ და გავაკეთეთ. გარწმუნებთ, რომ სრულად ვიაზრებდით, რამხელა პოლიტიკურ ინსტრუმენტს და რამხელა წნეხის საშუალებას ვაძლევდით პოლიტიკურ ოპონენტებს, მაგრამ ეს გავაკეთეთ....

მძიმე დანაშაულში ჩვენ გვაქვს ან უცვლელი მონაცემები ან კლება, ისეთი დანაშაულები, როგორიცაა დამამძიმებელ გარემოებებში მკვლელობა, ყაჩაღობა, სხეულის მძიმე დაზიანება - აქ ჩვენ გვაქვს კლება. უფრო მეტიც, რომ აიღოთ 2001 წლის სტატისტიკა და შეადაროთ 2017-2018 წლებს, ნახავთ, რომ მკვლელობებში და ყაჩაღობებში ასეთი დაბალი მაჩვენებელში ამ წლების განმავლობაში ბუნებაში არ ყოფილა.

რაც შეეხება ობიექტურ გარემოებას, ჩვენ ვაღიარებთ, რომ ზოგიერთი მიმართულებით ჩვენ გვაქვს მატება, მაგალითად ქურდობის მიმართულებით, ოჯახში ძალადობის მიმართულებით, ისეთი დანაშაულების მიმართულებით, რომლებიც საერთოდ არ აღირიცხებოდა - მაგალითად, მუქარის მიმართულებით. რა თქმა უნდა, აქედან გამომდინარე, შსს სრული გააზრებით დღევანდელი მდგომარეობით, გეგმავს მუშაობას, გეგმავს რეფორმების გატარების თანმიმდევრულობას და ყოველდღიურად, მდგომარეობიდან გამომდინარე, მოქმედებს ისე, როგორც საჭიროა.

ახლა რაც შეეხება იმ აჟიოტაჟს, რომ კატასტროფული მდგომარეობაა - მეგობრებო, მე სრული პასუხისმგებლობით ვაცხადებ, მთელ ჩემს გუნდთან ერთად, თითოეულ პოლიციელთან ერთად, რომელიც დღესაც აქ ჩემსავით ელოდებოდა შინაარსობრივ საუბარს, ხელისუფლება, მათ შორის პარლამენტი და ოპოზიციაც, რომელიც ხელისუფლების ნაწილია, მხარს დაუჭერს და დისკუსიაში შევა შინაარსობრივ ნაწილში, როგორ გამოვასწოროთ მდგომარეობა, მივიღეთ პოლიტიკური განცხადებები, რაც მისაღებია ასევე. კიდევ ერთხელ ხაზგასმით ვამბობ, რომ სტატისტიკური მონაცემები მძიმე დანაშაულის ნაწილში არის პოზიტიური. მე ერთმნიშვნელოვნად და ხაზგასმით ვამბობ, რომ დღეს შინაგან საქმთა სამინისტრო და პოლიცია პრინციპულად აკონტროლებს ყველაფერს, რაც ხდება ჩვენს ქუჩებში და ასევე დანაშაულის მიმართულებით, თუმცა ასევე აღიარებს, რომ ისეთი დანაშაულების ნაწილი, როგორიც არის ქურდობა, ოჯახში ძალადობა, მუქარა და კიდევ ბევრი, ჩვენ გვაქვს გარკვეული ზრდა", განაცხადა გახარიამ.