„მე ვამბობ აბსოლუტურად ერთმნიშვნელოვნად: მე მამუკა ხაზარაძისთვის წერილი არ მიმიწერია და არ გამიგზავნია“, განაცხადა შინაგან საქმეთა მინისტრმა გიორგი გახარიამ გადაცემა „პირველებში“.

„მე დაველოდები კიდევ რას იკადრებენ, თუნდაც მამუკა ხაზარაძე. მე მამუკა ხაზარაძისთვის წერილი არ მიმიწერია და არც გამიგზავნია მამუკა ხაზარაძისთვის რაიმე წერილი. წერტილი. ამის შემდგომ ყველა სახის საუბრები გაგრძელდება იმ ლოგიკიდან გამომდინარე, რა ქმედებები, ნაბიჯები ან რა სახკის ლოგიკით იქნება განვითარებული [მოვლენები]... მას ჰკითხეთ იცრუა თუ არა. მე ასე მარტივად ბრალდებებს არ ვაცხადებ, თან ეთერში. მე ვამბობ აბსოლუტურად ერთმნიშვნელოვნად: მე მამუკა ხაზარაძისთვის წერილი არ მიმიწერია და არ გამიგზავნია“, განაცხადა გახარიამ.

გიორგი გახარიამ აღნიშნა, რომ მისთვის გაუგებარია თუ რა იყო მამუკა ხაზარაძის მოტივი იმ დროს, როცა მან პარლამენტის ტრიბუნიდან გამოაცხადა, რომ შინაგან საქმეთა მინისტრისგან მუქარის წერილი მიიღო.

„მე მქონდა ამაზე ჩემი პირველი რეაქცია, აბსოლუტურად ღია, გარკვეულწილად ემოციური, რომლის გამეორება დღეს შემიძლია, თუმცა ჯერჯერობით თავს შევიკავებ... რა მოტივი ჰქონდა, ეს უნდა ჰკითხოთ მას. ეს ჩემთვისაც ჯერჯერობით გაუგებარია, თუმცა ჩემი პოზიცია, რომ... ჯერ ეს ერთი, მაქვს თმენის ბევრად უფრო მეტი ვალდებულება და მე ამ ვალდებულებას განვახორციელებ ბოლომდე, ეს ერთი. მეორე, რა თქმა უნდა მე ბევრად უფრო თავისუფალი ვიქნებოდი, რომ არ ვიყო იმ პოზიციაზე, რა პოზიციაზეც ვარ. მესამე, იმდენად არათანმიმდევრული განცხადებები მოჰყვა ამას ყველაფერს, ნაწილობრივ წინაც უძღოდა, უბრალოდ, ვფიქრობ, რომ არასწორი იქნება ჩემი მხრიდან ამაზე ახლა ასეთი რეაქციის მიცემა იმიტომ, რომ რამდენიმე რამ ითქვა, შემდგომ გადაითქვა, იყო შემთხვევა, როდესაც ამბობდნენ, რომ გახარია ითხოვს წილების დათმობას „თიბისიდან“, ასეთი შემთხვევაც იყო“, განაცხადა გიორგი გახარიამ.