„ჩემი მხრიდან არ იქნება სწორი ეკა ბესელიასთან პოლემიკაში შესვლა. პირიქით, მას სჭირდება თანადგომა, ხელი უნდა გავუწოდოთ, რომ ამოვიდეს. არ არის ეს ირონიით ნათქვამი, ის უნდა გამოვიდეს იმ მდგომარეობიდან, რომელშიც ის არის", აღნიშნული განცხადება პარლამენტის თავმჯდომარემ, ირაკლი კობახიძემ ყოფილი თანაგუნდელის, ეკა ბესელიას მიმართ გააკეთა.

კობახიძე მიიჩნევს, რომ ბესელია, რომლის პრიორიტეტიც ცხოვრებაში ძალაუფლებაა და რომელმაც ეს ძალაუფლება დაკარგა, არასწორ განცხადებებს აკეთებს.

„ის არის აღმოჩენილი რთულ მდგომარეობაში. შესაბამისად, მას სჭირდება არა პოლემიკა ჩვენი მხრიდან, არამედ პირიქით, დახმარება და თანადგომა. მას აქვს თავისი პრიორიტეტები ცხოვრებაში, ეს არის ძალაუფლება პირველ რიგში და მან დაკარგა მთავარი, რაც არის მისთვის ძალიან მნიშვნელოვანი. აქედან გამომდინარე, ემოციურ ფონზე ის აკეთებს არასწორ განცხადებებს. არის ტანდემში, მათ შორის თქვენ ტელევიზიასთან, „რუსთავი 2“-თან. ჩვენ ვნახეთ არაერთი გადაცემა, რომელიც ერთობლივად მოამზადეს და ეს არის ძალიან მარტივი შეცდომები, რომელიც არის თვალსაჩინო საზოგადოებისთვის", განუცხადა ჟურნალისტებს ირაკლი კობახიძემ.