87 წლის ასაკში ქართული კინოსა და თეატრის მსახიობი, საქართველოს სახალხო არტისტი ნოდარ მგალობლიშვილი გარდაიცვალა.

იგი 1931 წლის 15 ივლისს საგარეჯოს რაიონის სოფელ გომბორში დაიბადა. მან თბილისის სახელმწიფო თეატრალური ინსტიტუტის სამსახიობო ფაკულტეტი 1954 წელს დაამათავრა.

ნოდარ მგალობლიშვილმა კინოკარიერა მეორეხარისხოვანი როლებით 1958 წლიდან დაიწყო. კინოში ყველაზე დასამახსოვრებელი და გამორჩეული როლი მისი შესრულებით რუსი რეჟისორის მარკ ზახაროვის „სიყვარულის ფორმულაში“ გრაფი კალიოსტროა. ითამაშა ედმონდ სეშანის „ზღვის მაშვრალში“, ზაზა ილურიძის „ანთიმოზ ივერიელში“, რუსულ ტელესერიალში „სახელად ბარონი“ და სხვ.

ნოდარ მგალობლიშვილი საქართველოს დამსახურებული არტისტია 1976 წლიდან და საქართველოს სახალხო არტისტი 1979 წლიდან. 2016 წლიდან ის ასევე იყო თბილისის საპატიო მოქალაქე. ის სხვადასხვა დროს რუსთაველის და მარჯანიშვილის თეატრებში მუშაობდა. ადრეული პერიოდის როლებიდან აღსანიშნავია მისი როლები მაქსიმ გორკის პიესაში „ფსკერზე“, ჰენრიკ იბსენის - „მოჩვენებაში“. მოგვიანებით მან ითამაშა ლეო ქიაჩელის „ჰაკი აძბა“, იაგოს როლი უილიამ შექსპირის „ოტელოში“, თეიმურაზ ხევისთავი მიხეილ ჯავახიშვილის „ჯაყოს ხიზნებში“.