ტვერელის სახელობის ეკლესიის მიმდებარე ტერიტორიაზე მიმდინარე მშენებლობის შესახებ კახა კალაძემ თბილისის მუნიციპალიტეტის მთავრობის სხდომაზე განაცხადა, რომ იქ 2-3-სართულიანი ტერასული ტიპის სახლების მშენებლობა ხდება და არანაირ კორპუსებზე საუბარი არ არის, არც კოეფიციენტების მატებას აქვს ადგილი.

„თავიდან, როდესაც ვნახე გადათხრილი მიწის ნაკვეთი მეც დამაინტერესა... კანონის სრული დაცვით არის ყველაფრი გაკეთებული. იქ 7 ბარაკი იყო. ადამიანები გაუსაძლის პირობებში ცხოვრობდნენ“, განაცხადა კალაძემ და სინანულით აღნიშნა, რომ თუ ადრე ქალაქში მიმდინარე მშენებლობები განვითარებად აღიქმებოდა, დღეს ის „დანაშაულად“ ითვლება, რაც მერის თქმით, ბევრმა არასწორ ადგილას მიმდინარე მშენებლობამ განაპირობა.

„სამწუხაროა, რომ ის, რაც წლების განმავლობაში აღმშენებლობად ითვლებოდა, დღეს უკვე ერთგვარ დანაშაულად ითვლება. ეს კატეგორიულად მიუღებელია, თუმცა ისიც მესმის, რატომ არსებობს ეს დამოკიდებულება. ბევრი არასწორი პროექტი განხორციელდა ისეთ ადგილებში, სადაც არ უნდა გაკეთებულიყო. ადამიანებში ჩამოყალიბებულია ტენდენცია, რომ ყველა მშენებლობა დანაშაულია და არ აინტერესებთ, კანონის დაცვით კეთდება ის თუ არა. ჩემთვის მსგავსი დამოკიდებულება მიუღებელია. ყველაფერს გავაკეთებთ იმისთვის, რომ ეს რეალობა შევცვალოთ სწორი ქმედებებით, სწორი პროექტების განხორციელებით და ქალაქის ურბანულად სწორი განვითარებით. ჩვენ გვაქვს გენგეგმა, რომელიც გრძელვადიან პერიოდში ქალაქის სწორ განვითარებას გულისხმობს. შესაბამისად, მომდევნო წლების განმავლობაში, არსებულ პრობლემებს მოვაგვარებთ“, აღნიშნა დედაქალაქის მერმა.