„ქართული ოცნებიდან“ წასული დეპუტატი გედევან ფოფხაძე ბიძინა ივანიშვილთან პოლიტიკაში დაბრუნებამდე გამართულ შეხვედრას იხსენებს, რომელსაც მისი თქმით, მასთან ერთად ნუკრი ქანთარია და ზაზა პაპუაშვილი ესწრებოდნენ და რომელზეც ფოფხაძის განცხადებით, ბიძინა ივანიშვილმა პარლამენტის თავმჯდომარის, ირაკლი კობახიძის „შეთავაზება“ გააჟღერა, რომლის მიხედვითაც, „ვითარების დასალაგებლად“ პარტიიდან 6 ადამიანი უნდა გარიცხულიყო - მათ შორის ივანიშვილთან შეხვედრაზე მყოფები - გედევან ფოფხაძე, ნუკრი ქანთარია, ზაზა პაპუაშვილი და ასევე დამატებით კიდევ სამი დეპუტატი - რომან კაკულია, ლევან კობერიძე და დავით ჭიჭინაძე.

„თანმიმდევრულად როგორ თქვა ბატონმა ბიძინამ, მაგი არ მახსოვს, მაგრამ ეს 6 ადამიანი ვიყავით, სამი იქ მყოფი - თქვენი მონა-მორჩილი, ნუკრი ქანთარია, ზაზა პაპუაშვილი და სამი ადამიანი კიდევ, რომელიც ასე ვთქვათ ჩვენთან ერთად არ იყო - ეს იყო რომან კაკულია, ლევან კობერიძე და დათო ჭიჭინაძე. 6 ადამიანის გარიცხვა შემომთავაზაო ირაკლი კობახიძემო და თუ ამ 6 ადამიანს გავრიცხავთო, დალაგდება ვითარებაო. მითხრა, რომ მე მზადა ვარ ვიყო მედიატორი, დავალაგო ეს ურთიერთობები, არავინ არ უნდა გაირიცხოს; ასე საკითხი საერთოდ არ უნდა ისმებოდეს და თუ თქვენ შორის არის რაიმე წინააღმდეგობაა, ეს წინააღმდეგობები უნდა გადაწყდეს გუნდის შიგნით მეგობრული ურთიერთობით. მაგრამ ფაქტი თავისთავად იყო ძალიან საგანგაშო. მაშინ მოხდა ბევრი კონფლიქტი თვითონ ირაკლი კობახიძის მხრიდან. იგივე ის კონფლიქტი, რომელიც ბიძინა გეგიძესთან მოუვიდა და მერე ბოდიშის მოხდა მოუწია მაგის გამო“, განაცხადა გედევან ფოფხაძემ, რომლის თქმითაც, ივანიშვილთან აღნიშნული შეხვედრა მოყვა „საზოგადოებრივ მაუწყებელში“ ნინია კაკაბაძის კანდიდატურის მხარდაჭერას პარლამენეტში და მის განცხადებას.