საპარლამენტო უმრავლესობის წევრი ზვიად ძიძიგური მიიჩნევს, რომ მმართველ პოლიტიკურ პარტიას 2020 წლის საპარლამენტო არჩვენებში „პრობლემები ექნება" იმ შემთხვევაში, თუ პარტია მის წინაშე არსებულ გამოწვევებს ვერ გაუმკლავდება.

„2020-ში ჩვენ გვექნება პრობლემები, თუ არ დავაბრუნებთ კომუნიკაციას მოსახლეობასთან. აუცილებლად, ჩვენ გვჭირდება ისეთი პოლიტიკური, ეკონომიკური - ისეთი ტიპის პროექტები, რომლებიც იქნება საქართველოს მოსახლეობის ინტერესების შესაბამისობაში. ჩვენ, მნიშვნელოვანია და აუცილებელია, ვიფიქროთ იმაზე, რომ ევროკავშირის კანონმდებლობასთან ჰარმონიაში მოვიყვანოთ ჩვენი კანონმდებლობა. ჩვენ სიღარიბის დაძლევის პრობლემის წინაშე ვდგავართ და ვამბობთ ყოველთვის, რომ ჩვენი მთავარი გამოწვევა ეს არის სიღარიბე და სიღარიბის დაძლევას ვერ განვახორციელებთ თუ რაღაცა ტიპის კონკრეტული აქტიური პროგრამები არ განვახორციელეთ. მოსახლეობამ რაღაც მესიჯი ჩვენ საპრეზიდენტო არჩვენების დროს გამოგვიგზავნა და მივიღეთ ჩვენ ეს მესიჯი", აცხადებს ზვიად ძიძიგური.

ჟურნალისტის შეკითხვაზე, რამდენად გაითვალისწინა ხელისუფლებამ საზოგადოების მესიჯი მაშინ, როდესაც მოსამართლეების თემასთან დაკავშირებით საზოგადოების დაკვეთის სრული იგნორირება მოახდინა, ძიძიგურმა აღნიშნა, რომ მოსახლეობის დაკვეთის იგნორირება არ მომხდარა.

„არც ერთ ნაწილს საზოგადოების დაკვეთა არ მოუცია, რომ სასამართლო დამოუკიდებელი არ იყოს. პერსონებთან დაკავშირებით თუ აქვს საზოგადოებას რაიმე ტიპის პრობლემა, ასეთი პერსონები უმრაველსობის წევრებსაც გვაქვს. ამ პერსონებთან დაკავშირებით, ჩვენ კითხვის ნიშნები არ გვაქვს - ისინი - გახდებიან თუ არ გახდებიან - დარწმუნებულები ვართ, რომ ვერ გახდებიან. ამიტომ, სასამართლოს ნაწილში, ჩვენ საზოგადოების საწინააღმდეგო ნაბიჯი არ გადაგვიდგამს", განაცხადა ძიძიგურმა „ტვ. პირველის" გადაცემაში „პოლიტმეტრი" სტუმრობისას.