ვენესუელას ოპოზიციის ლიდერს, ხუან გუაიდოს საჯარო სამსახურში შემდგომი თანამდებობის დაკავების უფლება 15 წლით აეკრძალება - მაქსიმალური ვადით, რის საშუალებასაც კანონი იძლევა - განაცხადა სახელმწიფო საფინანსო კონტროლიორმა.

რევიზორმა ელვის ამოროსომ აღნიშნა, რომ გუაიდოს პერსონალური საფინანსო მონაცემები შეუსაბამობებს შეიცავდა.

როგორც BBC კარაკასიდან იუწყება, გუაიდოსთვის საჯარო სამსახურში თანამდებობის დაკავების აკრძალვა ძალაში შევა იმ შემთხვევაში, თუკი ის გადაწყვეტს მას შემდეგაც იყაროს კენჭი, როცა მისი ამჟამინდელი თანამდებობაზე ყოფნის ვადა ეროვნულ ასამბლეაში ამოიწურება.

ეროვნული ასამბლეის სპიკერმა გუაიდომ, რომელმაც საკუთარი თავი 24 იანვარს ვენესუელას დროებით პრეზიდენტად გამოაცხადა და იგი 50-ზე მეტმა ქვეყანამ, მათ შორის შეერთებულმა შტატებმა ცნო ქვეყნის ლიდერად, ამოროსოს მიერ გამოცხადებული ინფორმაციის კომენტირებაზე უარი თქვა და აღნიშნა, რომ იგი „გენერალური აუდიტორი“ არ არის.

გასულ კვირას გუაიდოს ადმინისტრაციის ხელმძღვანელი, 49 წლის რობერტო მარერო (მაღლა ფოტოზე, მარცხნივ) „საბოტაჟის ქმედებების“ დაგეგმვის ბრალდებით დააკავეს.

ვენესუელას შინაგან საქმეთა მინისტრმა ნესტორ რევეროლმა განაცხადა, რომ სპეცსამსახურების მიერ მისი სახლის რეიდისას „იარაღი და უცხოური ვალუტაა“ ნაპოვნი.

გუაიდომ თქვა, რომ უსაფრთხოების ძალებმა „არალეგალური და არაკონსტიტუციური“ ქმედება ჩაიდინეს და დაამატა, რომ იგი დარწმუნებულია, რომ იარაღი, რომელიც თითქოსდა მარეროს სახლში იპოვეს, იქ მიტანილი არის.

მარეროს დაპატიმრებამ საერთაშორისო საზოგადოების შეშფოთება გამოიწვია. შეერთებული შტატები, ევროკავშირი და ლათინური ამერიკის სახელმწიფოები მის დაუყოვნებელ გათავისუფლებას მოითხოვენ.