უკრაინაში საპრეზიდენტო არჩევნები იმართება და ქვეყნის მოქმედ ლიდერს, პეტრო პოროშენკოს, რომელიც მეორე ვადით იყრის კენჭს გასაკვირ მეტოქეობას კომიკოსი ვლადიმერ ზელენსკი უწევს.

ორივე კანდიდატმა, ისევე როგორც ყოფილმა პრემიერ მინისტრმა, იულია ტიმოშენკომ საარჩევნო კამპანიისას პრო-დასავლური შეხედულებები გამოხატა და არც ერთი პრო-რუსული კანდიდატი არ არის ისეთი, რომელსაც სერიოზული წარმატების მოპოვების შესაძლებლობა შეიძლება გააჩნდეს.

თუკი დღევანდელ არჩევნებში ვერც ერთი კანდიდატი ვერ შეძლებს 50%-ზე მეტი ხმის მოგროვებას, 21 აპრილს პირველ და მეორე ადგილებზე გასული კანდიდატები შეებრძოლებიან ერთმანეთს.

საარჩევნო ბიულეტენში სულ 39 კანდიდატია ჩაწერილია, მაგრამ მხოლოდ სამ მთავარ კანდიდატს აქვს გამარჯვების შანსი.

ვინ არიან მთავარი კანდიდატები?

სოციოლოგიური გამოკითხვებით პირველ ადგილზე მყოფი 41 წლის ვლადიმერ ზელენსკი, სატირული სატელევიზიო შოუს წამყვანი, უფრო ახალგაზრდა ამომრჩეველთა მოზიდვას ცდილობს და საარჩევნო კამპანიისას მან ფართოდ გამოიყენა სოციალური მედია. იგი მოქალაქეებს კორუფციის დამარცხებას ჰპირდება.

53 წლის პეტრო პოროშენკო კონსერვატორი უკრაინელების მიმხრობას ცდილობს და მისი სლოგანია „არმია, ენა სარწმუნოება“.

პოროშენკოს პრეზიდენტობისას ევროკავშირთან ასოცირების ხელშეკრულება, მათ შორი უკრაინელებისთვის შენგენის ზონაში უვიზო მიმოსვლის შეთანხმება გაფორმდა, ასევე რაც ძალიან მნიშვნელოვანია - უკრაინის მართლმადიდებელმა ეკლესიამ რუსეთის კონტროლს დააღწია თავი და დამოუკიდებელი გახდა.

თუმცა მისი საარჩევნო კამპანიისას კორუფციის ბრალდებებმა იფეთქა, მათ შორის კითხვის ნიშნის ქვეშ დადგა თავდაცვის სფეროში შესყიდვების კანონიერება.

მესამე კანდიდატი, 58 წლის იულია ტიმოშენკო ქვეყნის პრემიერ მინისტრის პოსტზე მსახურობდა და კენჭს იყრიდა 2010 წლის და 2014 წლის საპრეზიდენტო არჩევნებში. მან წამყვანი როლი ითამაშა 2004 წლის „ნარინჯისფერ რევოლუციაში“.

პრო-რუს კანდიდატებს შორის პირველ ადგილზე მყოფი იური ბოიკო კი აცხადებს, რომ იგი რუსეთთან ურთიერთობების „ნორმალიზებას“ მოახდენს.