თურქეთის პრეზიდენტის, რეჯეფ თაიფ ერდოღანის პარტიამ ადგილობრივ არჩევნებზე ანკარაში კონტროლი დაკარგა, რაც მისი ხელისუფლებაში 16-წლიანი ყოფნის წარუმატებლობად იქნა აღქმული.

მაგრამ ქვეყნის ყველაზე დიდ ქალაქში, სტამბოლში ორივემ, ერდოღანის „სამართლიანობისა და განვითარების პარტიამ“ და ოპოზიციამაც განაცხადა, რომ უმრავლესობა თავად მოიპოვა.

მთელი ქვეყნის მასშტაბით კი, პრეზიდენტის „სამართლიანობისა და განვითარების პარტიის“ ლიდერობით შექმნილმა ალიანსმა ამომრჩეველთა ხმების 51%-ზე მეტი მიიღო.

„თუკი რაიმე ნაკლოვანებებია, ჩვენი ვალია გამოვასწოროთ ის“, განაცხადა პრეზიდენტმა.

აღნიშნული არჩევნები ფართოდ იყო მიჩნეული, როგორც რეფერენდუმი ერდოღანის ხელმძღვანელობის.

მერების და მუნიციპალური საბჭოების არჩევნებზე 57 მილიონზე მეტი ამომრჩეველი იყო დარეგისტრირებული.

თურქეთის მედიის ცნობით, ანკარაში „რესპუბლიკური სახალხო პარტიის“ სეკულარისტმა კანდიდატმა, მანსურ იავასმა აშკარა გამარჯვება მოიპოვა, მაგრამ სტამბოლში ორივე პარტია, როგორც „რესპუბლიკური სახალხო პარტია“, ისე პრეზიდენტის „სამართლიანობისა და განვითარების პარტია“ ამტკიცებს, რომ მერის არჩევნებში გამარჯვება მცირე უპირატესობით თავად აქვს მოპოვებული.

„რესპუბლიკური სახალხო პარტიის“ კანდიდატმა, ეკრემ იმამოღლუმ განაცხადა, რომ მან თითქმის 28 000 ხმით მოიპოვა გამარჯვება, მაშინ როცა „სამართლიანობისა და განვითარების პარტიის“ კანდიდატი, ქვეყნის ყოფილი პრემიერ მინისტრი ბინალი ილდირიმი აცხადებს, რომ 4 000 ხმით არის წინ. ორივე კანდიდატმა, ცალ-ცალკე 4 მილიონზე მეტი ხმა მიიღო.

„რესპუბლიკურმა სახალხო პარტიამ“ ასევე განაცხადა, რომ მან გამარჯვება მოიპოვა იზმირში, თურქეთის მესამე ყველაზე დიდ ქალაქში.