ვიზიარებ „ნაციონალური მოძრაობის“ პოზიციას, მინდა, რომ შევიდე მათ რიგებში, ალბათ მალე მიმიღებენ - უთხრა „ნაციონალური მოძრაობის“ 24 მარტს გამართულ ყრილობაზე საზოგადოებრივ მაუწყებელს საქართველოს შეიარაღებული ძალების გენერალური შტაბის ყოფილმა უფროსმა, გენერალმა დევი ჭანკოტაძემ.

„აქ ვიმყოფები სტუმრის სტატუსით. აბსოლუტურად ვიზიარებ „ნაციონალური მოძრაობის“ პოზიციას, პროგრამას და მხარს ვუჭერ.

იმედი მაქვს, გაიმარჯვებენ არჩევნებში და საქართველოს ეყოლება ნამდვილი პატრიოტი, ეროვნული მთავრობა და პარლამენტი. აუცილებლად მინდა, რომ შევიდე მათ რიგებში. ალბათ მალე მიმიღებენ“, განაცხადა დევი ჭანკოტაძემ, რომელიც 2018 წლის საპრეზიდენტო არჩევნების მეორე ტურში ყოფილ სამხედროებთან ერთად დამოუკიდებელი და „ქართული ოცნების“ მხარდაჭერილი საპრეზიდენტო კანდიდატის, სალომე ზურაბიშვილის წინააღმდეგ გამოდიოდა.

საარჩევნო კამპანიის დროს, მუხათგვერდის ძმათა სასაფლაოზე, სამხედრო ფორმაში ჩაცმულმა დევი ჭანკოტაძემ განაცხადა, რომ საქართველოს მომდევნო პრეზიდენტი და მთავარსარდალი ვერ იქნება ის ადამიანი, ვინც „დაადანაშაულებს საქართველოს ომის დაწყებაში“. „დარწმუნებული ვარ, რომ საქართველო გააკეთებს სწორ არჩევანს“, – აღნიშნა მან.