საქართველოს პრემიერ მინისტრი მმართველი პარტიის თავმჯდომარის მიერ გუშინ ტელეკომპანია „იმედის" ეთერში გაკეთებულ განცხადებებს აფასებს.

სტრასბურგში ვიზიტად მყოფმა მამუკა ბახტაძემ ქართველ ჟურნალისტებს უთხრა, რომ ბიძინა ივანიშვილმა მიმდინარე პოლიტიკურ მოვლენებზე გულწრფელი შეფასებები გააკეთა.

„ბიძინა ივანიშვილისგან ჩვენ გუშინ კიდევ ერთხელ მოვისმინეთ გულწრფელი შეფასება, პოლიტიკური შეფასება, მათ შორის საქართველოში არსებულ პოლიტიკურ გარემოსთან დაკავშირებით; იმ გამოწვევებზე, რომელიც გვაქვს ჩვენს ქვეყანაში და იმ ეროვნულ ინტერესებზე, რომლებიც უნდა აერთიანებდეს საქართველოს თითოეულ მოქალაქეს და თითოეულ პოლიტიკურ ძალას.

ბუნებრივია, ჩვენ გუნდში გვაქვს ხოლმე კონსულტაციები. თქვენ იცით, რომ ჩვენ გვაქვს წარდგენილი ძალიან ამბიციურ რეფორმათა პაკეტი და დღესაც მოისმინეთ ჩვვენი ევროპელი მეგობრების, რომ ჩვენი რეფორმათა პაკეტი მართლაც არის ამბიციური და შედეგებზე ორიენტირებული. ჩვენ ვართ შედეგებზე ორინტირებული მთავრობა. კონსულტაციები ყოველთვის მიდიოდა. მე გიდასტურებთ, რომ ახლაც მიდის. დასკვნების გაკეთება ჯერ ნაადრევია. მე ყოველთვის დაგიდასტურებთ იმას, რომ ჩვენ ვართ ყოველთვის ორიენტირებული პროგრესზე, ორიენტირებული იმაზე, რომ ჩვენ ვიყოთ დარწმუნებული, რომ ის ადამიანური რესურსი, რომელიც ჩვენ გვაქვს, მაქსიმალურად ეფექტურად არის გამოყენებული იმ მიზნების მისაღწევად, რაც არის ქვეყნის წინაშე", განუცხადა მედიას მამუკა ბახტაძემ.