თურქული კომპანია „Fast track textile“, გურიაში რამდენიმე მილიონი დოლარის ღირებულების ინვესტიციას განახორციელებს. ამ საკითხთან დაკავშირებით სახელმწიფო რწმუნებული-გუბერნატორი გურიის მხარეში, გია სალუქვაძე კომპანიის დირექტორს ალი შაჰინს შეხვდა.


გურიის სამხარეო ადმინისტრაციის ინფორმაციით, „Fast track textile“-ს ძირითად საქმიანობას სპორტული ტანსაცმლის წარმოება წარმოადგენს. დამფუძნებელი, მსოფლიო ბაზარზე Adidas, NIKE, VANS -ის ფირმების უმსხვილეს მწარმოებელ კომპანიად არის ცნობილი. კომპანიის მიზანი ქალაქის ცენტრალურ უბანში სამკერვალო საწარმოს აშენება გახლავთ. ქალაქ ოზურგეთის მუნიციპალიტეტის ტერიტორიაზე არსებული სახელმწიფო-სარეალიზაციო ფართების შესწავლის შემდეგ მოლაპარაკება შემდეგ ეტაპზე გადავა. პროექტის განხორცილების შემდეგ საწარმო 450-მდე ადგილობრივ მცხოვრებს დაასაქმებს.


„მხარის ხელისუფლება კომპანიას პროექტის წარმატებით განხორციელების საქმეში სრულ მხარდაჭერას უცხადებს. გურიის რეგიონში ინვესტიციების განხორციელებისთვის ყველანაირი პირობა არსებობს. მსგავსი სახის პროექტები რეგიონის ეკონომიკურ მდგომარეობას მნიშვნელოვნად გააუმჯობესებს. მინდა მადლობა გადავუხადო ოზურგეთის მაჟორიტარ დეპუტატს ზვიად კვაჭანტირაძეს, რომლის უშუალო მონაწილეობითაც შედგა დღევანდელი შეხვედრა,“ - განაცხადა გია სალუქვაძემ.


შეხვედრას გუბერნატორის მოადგილე, სოსო ერქომაიშვილი, ქალაქ ოზურგეთის მუნიციპალიტეტის მერი, ბეგლარ სიორიძე, ოზურგეთის მაჟორიტარი დეპუტატის ბიუროს ხელმძღვანელი, მურთაზ ფოცხიშვილი და „Fast track textile-ს“ კომპანიის წარმომადგენლები დაესწრნენ.