თბილისის საკრებულო წევრებმა, ვახტანგ შაქარიშვილმა და ჯაბა ჯიშკარიანმა „ქართული ოცნების“ რიგები დატოვეს.

შაქარიშვილმა და ჯიშკარიანმა ბრიფინგზე განაცხადეს, რომ ისინი 13 აპრილს დავით მაღრაძის „დაიცავი საქართველოს“ უერთდებიან.

„სამწუხაროდ, ბოლო პერიოდში ჩვენ თვალს ვადევნებთ მორალური ფასეულობების გადახედვის უხეშ მცდელობებს. ჩვენთვის კატეგორიულად მიუღებელია შავის თეთრად წარმოჩენა. ჩემთვის მიუღებელია, მურუსიძე-ჩინჩალაძე-ზარდიაშვილის სამართლიანობის მაგალითად გასაღება.

ჩემთვის მიუღებელია, პრინციპული და ღირსეული ადამიანების მრავალწლიანი უთანასწორო ბრძოლის უშედეგოდ გამოცხადება, მათი დაკნინებისა და „ნაცებად" სახელდების მცდელობა. ჩემთვის მიუღებელია, სააკაშვილ-ადეიშვილის ჯალათების უხეში „გაპრავება".

ეს ყველაფერი კრიტიკულ წინააღმდეგობაში 2012 იდეალებთან და იმ დაპირებებთან, რომლებიც სულ ახლახან, საპრეზიდენტო არჩევნების მეორე ტურის წინ გაიცა. სწორედ ამიტომ, მე ვტოვებ „ქართული ოცნების" უმრავლესობას და 13 აპრილს, 14:00 საათზე ფილარმონიაში ვუერთდები „დაიცავი საქართველოს" საგანგებო შეკრებას.

მოვუწოდებ ყველას, განსაკუთრებით ახალგაზრდებს, ვინც თვლის, რომ ეს უპერსპექტივო წრე გასარღვევია, შემოგვიერთდით და ერთად შევქმნათ ახალი პოლიტიკური ასპარეზი, სადაც მოძალადე და მედროვე კი არ ფასდება, არამედ ღირსეული, სამართლიანი და პრინციპული ადამიანი", განაცხადა ვახტანგ შაქარიშვილმა.