"ქართული დასის" ლიდერის, ჯონდი ბაღათურიას ინფორმაციით, "თელასი" ელექტროენერგიის ტარიფის 6 თეთრით გაზრდას ითხოვს, - ამის შესახებ ბაღათურიამ ენერგეტიკისა და წყალმომარაგების მარეგულირებელი ეროვნული კომისიის წინ გამართულ ბრიფინგზე განაცხადა.


სემეკში დღეს სხდომა უნდა გაიმართოს, რომელზეც "თელასის" სატარიფო განაცხადზე საქმის წარმოების დაწყების თაობაზე მოხდება მსჯელობა. როგორც ბაღათურიამ სემეკის სხდომის დაწყებამდე აღნიშნა, ხელისუფლება არღვევს კანონს და ისევ ქურდულად ატარებს სემკის სხდომას, სადაც "თელასის" განაცხადის წარმოებაში მიღებასთან დაკავშირებული საკითხი განიხილება.
როგორც ბაღათურიამ აღნიშნა, სემეკი თვალთმაქცობს და არ აცხადებს, რამდენი თეთრით ითხოვს "თელასი" ტარიფის გაზრდას. თუმცა მან აქვე აღნიშნა, რომ მისი ინფორმაციით, თელასი ითხოვს, რომ ელექტროენერგიის ტარიფი 6 თეთრით გაიზარდოს.


"სემეკს აქვს 150-დღიანი ვადა გადაწყვეტილების მისაღებად. დღეს სემეკი ვალდებულია გამოაცხადოს თარიღი, როდის გაიმართება სხდომა, რომელზეც გადაწყდება ტარიფის გაზრდის ან არგაზრდის საკითხი. თუმცა სემეკი ამას არ გააკეთებს და მალულად, შუა აგვისტოში გამართავს სხდომას, სადაც მიიღებს გაზრდის შესახებ გადაწყვეტილებას", - განაცხადა ბაღათურიამ.


როგორც "ქართული დასის" ლიდერმა აღნიშნა, ტარიფების გაზრდით დაინტერესებულია ვიცე პრემიერი, ენერგეტიკის მინისტრი კახა კალაძე. მისივე თქმით, მალე "თბილგაზის" განაცხადის შესწავლა მოხდება, რომელიც გაზის ტარიფის გაზრდას ითხოვს. ასევე გაიზრდება წყლის ტარიფი, ეს ყველაფერი კი გამოიწვევს ფასის ცვლილებას პურზე.


ჯონდი ბაღათურია ვარაუდობს, რომ ოქტომბერში პურის ფასი მოიმატებს, ლარ-ნახევრიდან, 2 ლარამდე.


"ქართული დასის" ლიდერი, ჯონდი ბაღათურია ენერგეტიკისა და წყალმომარაგების მარეგულირებელი ეროვნული კომისიის სხდომაზე დასწრებას გეგმავს.