მცდარია მოსაზრება, რომ თითქოს ბიძინა ივანიშვილი საჭადრაკო დაფაზე ფიგურებს ანაცვლებს. არა. უბრალოდ, იშლებიან. არც თუ ისე ცოტა აქტივისტი აპირებს პარტია „ქართული ოცნების“ დატოვებას და „დაიცავი საქართველოსთან“ გადაბარგებას, - განაცხადა „ერთიანი ნაციონალური მოძრაობის“ პოლიტიკური საბჭოს თავმჯდომარემ, ნიკა მელიამ ტელეკომპანია „კავკასიას“ ეთერში სტუმრობისას.

„მცდარია თავშივე ის მოსაზრება, რომ თითქოს ბიძინა ივანიშვილი საჭადრაკო დაფაზე ფიგურებს ანაცვლებს. მცდარია, ხალხო. ამით რისი თქმა გვინდა, რომ ბიძინა ივანიშვილის შესაძლებლობები არის იმდენად მძლავრი, რომ მას აქვს უნარი და ენერგია შემორჩენილი, რომ რაღაცები გადაათამაშოს? არა, უბრალოდ, იშლებიან ხალხნო, ი-შლე-ბი-ან!!! ხშირ შემთხვევაში ეს არის ბიზნესინტერესები, რომელმაც კონფლიქტი გამოიწვია რიგ „ქართული ოცნების“ ცნობად ე.წ. სახეებში, მაღალჩინოსნებში. გახარია, კალაძე და ღარიბაშვილი ერთმანეთს იმდენად ვერ იტანს, იმდენად ვერ იტანს, რამდენადაც ბევრს არ წარმოუდგენია.

ბესელია... ბიძინა ივანიშვილს უნდოდა ეკა ბესელია მჯდარიყო წყნარად კაბინეტში, აძლევდა ვიცე-სპიკერის თანამდებობას და ეუბნებოდა, შედი და ჩუმად იყავიო. ახლა, რა მიზეზით, როგორ, რაღა მნიშვნელობა აქვს, ამ ქალმა იყვირა და დაუპირისპირდა, მერე მოხდა ის, რაც მოხდა, მანამდე ბატონმა ჭიჭინაძემ, ხომ? ი-შლე-ბი-ან ხალხნო!!!

რატომ გამოვიდა ბატონი კობახიძე, პარლამენტის თავმჯდომარე და ერთ-ერთ მთავარ თემად რა აქცია?. აი, თქვენო, ფილარმონიაში რომ შეიკრიბეთო, 3 პროცენტზე მეტს ვერ აიღებთო და ვერც გადალახავთო. რატომ? ისმის კითხვა. ვინიდან და რადგანაც კობახიძემ და არა მარტო მან, მშვენივრად იცის განწყობები პარტია „ქართულ ოცნებაში“, რომ არც თუ ისე ცოტა აქტივისტი აპირებს პარტიის დატოვებას და მათ შორის გადაბარგებას ამათთან და ახლა უნდათ რომ გააშავონ მაქსიმალურად და უთხრან, რომ ისინი არიან წყალწაღებულები, უპერსპექტივონი და მათთან მეგობრობა არის განწირული მარცხისთვის“, აღნიშნა მელიამ.