ოფიციალურად დადასტურებული ინფორმაციით, სულ მცირე 207 ადამიანია მოკლული და 400-ზე მეტს დაზიანებები აქვს მიღებული შრი ლანკაში ეკლესიებსა და სასტუმროებში მომხდარი აფეთქებებისას. მოელიან, რომ მსხვერპლის რაოდენობა გაიზრდება. ადგილობრივი მედიის ცნობით, დაღუპულთა შორის შესაძლოა უცხოელი ტურისტებიც იყვნენ.  

კოლომბოს ეროვნული საავადმყოფოს დირექტორმა განაცხადა, რომ საავადმყოფოში 45 ცხედარია, მათ შორის 9 უცხოელის. მან ასევე თქვა, რომ იქ დიდი რაოდენობით დაჭრილებიც იმყოფებიან.  

შრი ლანკას პრემიერ მინისტრი მთავრობის საგანგებო სხდომას მართავს.

BBC-ის ცნობით სულ 6 აფეთქება მოხდა, მათგან 3 ეკლესიებში, სააღდგომო წირვებისას, ხოლო სამი სხვა აფეთქება სასტუმროებში.

შრი ლანკას პრეზიდენტმა მაიტრიპალა სირისენამ ერს მიმართა და სიმშვიდისკენ მოუწოდა.

მან განაცხადა, რომ „უსაფრთხოების ძალების მთელი შემადგენლობაა“ განლაგებული ქვეყანაში, რათა მოსახლეობა შემდგომი თავდასხმებისგან იყოს დაცული. მან ასევე თქვა, რომ მიმდინარეობს ძიება იმის დასადგენად თუ ვინ განახორციელა სერიული აფეთქებები.

ყველა სამთავრობო სკოლა დაკეტილი იქნება 22 და 23 აპრილს, განაცხადა განათლების მინისტრმა აკილა ვირაჯ კარიავასამმა. 

40-ზე მეტი ადამიანი კოლომბოში, წმინდა ანტონის ეკლესიაში იქნა მოკლული. ტაძართან მყოფი BBC-ის სინჰალას სამსახურის ჟურნალისტი აზამ ამენი ყვება:

„არავინ მოელოდა ამას. ეს იყო მშვიდობიანი კვირა დილა - ყველა აღდგომის წირვაზე მიდიოდა და უეცრად ეს თავდასხმა. მე ვესაუბრე რამდენიმე მღვდელს, რომლებიც ეკლესიის შიგნით იმყოფებოდნენ და ისინი ნამდვილად შოკირებული არიან. ასევე შოკირებულია პოლიცია. ეს იყო კარგად დაგეგმილი, კარგად კოორდინირებული თავდასხმა“.

კოლომბოს არქიეპისკოპოსმა სულ ახლახან გაავრცელა განცხადება, რომ ეკლესიებზე მომხდარი თავდასხმების გამო საღამოს სააღდგომო წირვები გაუქმებულია.