„ჰესის თემა გადავდეთ. ჩვენ შევთანხმდით ესეთ რაღაცაზე. ჰესს 90% მოსახლეობა რომ დაუჭერს მხარს, მაშინ აშედება მარტო. მე აქ ჰესის გამო არ ამოვსულარ. მე მოვედი იმის გამო, რომ ქვები ესროლეთ ფორმიან ადამიანებს“, უთხრა შინაგან საქმეთა მინისტრმა გიორგი გახარიამ პანკისის მოსახლეობას.

გახარიამ ასევე აღნიშნა, რომ შინაგან საქმეთა სამინისტროს სპეციალური დანიშნულების ქვედანაყოფები ხეობას დატოვებენ.

„რაც შეეხება ჩვენს შეთანხმებას. ჩვენი შეთანხმება არის ძალიან მარტივიც და ამავდროულად რთულიც, მიღწევადიც და პრაგმატულიც. რა თქმა უნდა, ყველა ის ადამიანი, რომელმაც ფიზიკურად იძალადა შინაგან საქმეთა სამინისტროს თანამშრომლებზე, კანონის სრული პასუხიმგებლობით შესაბამისობაში აგებს პასუხს. ეს ერთი. მეორე, ჩვენ ასევე შევთანხმდით, რომ კომპანიის წარმომადგენლები გააგრძელებენ ადგილობრივ მოსახლეობასთან საუბარს და სანამ კონკრეტულ ზღვრულ რაოდენობას მხარდაჭერის არ მიაღწევენ, ისინი ამ ერთ კონკრეტულ შემთხვევაში გააგრძელებენ მათთან საუბარს. თუმცა აქ არის კიდევ რამდენიმე სხვა პროექტი, რომელზეც აქტიურად დაიწყება მუშაობა. ამასთან ერთად, შინაგან საქმეთა სამინისტროს სპეციალური დანიშნულების ქვედანაყოფები ხეობას დატოვებენ, თუმცა შინაგან საქმეთა სამინისტროს გაძლიერებული პოლიცია დარჩება ხეობაში“, განაცხადა გიორგი გახარიამ.