სასჯელაღსრულებისა და პრობაციის ყოფილმა მინისტრმა გიორგი მღებრიშვილმა სამინისტროს თანამშრომლებს ახალი მინისტრი კახა კახიშვილი წარუდგინა. გიორგი მღებრიშვილმა საკუთარი მინისტრობის პერიოდი შეაფასა და განაცხადა, რომ სისტემაში ბევრი მნიშვნელოვანი პროექტი განხორციელდა.


როგორც მღებრიშვილმა აღნიშნა, მას გული სწყდება, რომ ელექტრონულ მონიტორინგზე გადასვლა მისი სასჯელაღსრულების მინისტრობის პერიოდში ვერ მოხერხდა და დასძინა, რომ ამ პროექტსაც ახალი მინისტრი განახორციელებს.


„მართლა ამაყი ვარ, რომ კარგი შედეგები დაიდო. მართლა ამაყი ვარ, რომ პრემიერმა აბსოლუტურად სწორი შეფასებები მისცა იმას, რაც ჩვენ ვიშრომეთ და გავაკეთეთ. დარწმუნებული ვარ, რომ ღირსეულად გაგრძელდება ის კარგი პროექტები, რაც წამოწყებულია და რაც ვერ მოვასწარით. გული მწყდება, რომ ვერ მოვახერხეთ ელექტრონულ მონიტორინგზე გადასვლა, გარკვეული პირობების გამო, ობიექტური და სუბიექტური პირობების გამო, ქვეყანაში შექმნილი ფინანსური პრობლემების გამო, მაგრამ ამისთვის ყველაფერი მზად არის და მინდა წარმატება გისურვოთ. ბატონი კახა ამ საქმეს ღირსეულად გააგრძელებს”, – განაცხადა მღებრიშვილმა.

კახა კახიშვილის წარდგენის შემდეგ, გიორგი მღებრიშვილი შინაგან საქმეთა სამინისტროში მივიდა. უწყებაში მას უკვე ყოფილი მინისტრი ვახტანგ გომელაური დახვდა, რომელმაც მღებრიშვილი თანამშრომლებს წარუდგინა.


ვახტანგ გომელურმა გიორგი მღებრიშვილს შინაგან საქმეთა მინისტრად დანიშვნა მიულოცა და აღნიშნა, რომ დარწმუნებულია, მღებრიშვილი წარმატებული მინისტრი იქნება.


მღებრიშვილმა თავის მხრივ განაცხადა, რომ პირველი რასაც გააკეთებს, ეს იქნება უწყებაში არსებული სიტუაციის ანალიზი და მხოლოდ ამის შემდეგ დასახავს პრიორიტეტებს.