სახელმწიფო უსაფრთხოების სამსახურის მიერ გავრცელებულ აუდიოჩანაწერს, სადაც მალხაზ მაჩალიკაშვილი ტერორისტული აქტის ორგანიზების გზით რამდენიმე პირის მკვლელობის განზრახვის შესახებ საუბრობს, „ევროპული საქართველოს“ წევრი, დეპუტატი გიგა ბოკერია ეხმაურება.

როგორც მან „TV პირველის“ ეთერში განაცხადა, „თუ აქ არ არის ფაბრიკაცია და [ჩანაწერი] ავთენტურია... მაშინ მტკიცებულება ძალიან სერიოზულია და ამას უნდა მოჰყვეს ნაბიჯები“.

„თუ აქ არ არის ფაბრიკაცია და ავთენტურია და ეს არ გახლავთ ჩემი მხრიდან თავდასხმა, ეს არის დათქმა უბრალოდ. მე არ ვამტკიცებ, რომ ეს ფაბრიკაციაა. დაცვა იძახის, რომ არისო, ახლა გადაუთქვია თურმე და ეს ძალიან ცუდის ნიშანია დაცვისთვის და ამის ჩვენება ადვილია ტექნიკურად ხომ? ეს კი არ არის რაღაც, რომ ვერ გაარკვევ ამას და თუ ეს ასე არის, გასაგებია, მაშინ მტკიცებულება ძალიან სერიოზულია და ამას უნდა მოჰყვეს ნაბიჯები და თუ ამას არ მოყვება ნაბიჯები, მაშინ ჩნდება მთელი თაიგული კითხვების მათ [ხელისუფლების] კომპეტენტურობაზე, რისთვის შეკერეს, რომ აქაც პიარს ეწევიან და არა პირველ რიგში საფრთხეების თავიდან აცილებას. ყველაფერი ერთად ისევ არის ის სურათი, რომ ჩვენ არ გვყავს ხელისუფლება, რომელსაც აქვს უნარი, ხედვა, რომ დაიცვას ჩვენი ქვეყნის ინტერესები და ჩვენი მოქალაქეების ინტერესები“, განაცხადა გიგა ბოკერიამ.