პარტია „დემოკრატიული მოძრაობის“ რიგების დატოვების შემდეგ გუბაზ სანიკიძემ ის მიზეზი დაასახელა, თუ რის გამო დატოვა თავისი ბავშვობის მეგობრის, ნინო ბურჯანაძის პარტია. ტელეკომპანია „ობიექტივის“ ეთერში სანიკიძემ აღნიშნა, რომ მას პარტიაში ჰქონდა „კონფლიქტი იმასთან დაკავშირებით, რომ თითქოს მე გავმიშისტდი“. გუბაზ სანიკიძემ თქვა, რომ „მშობლიურ გარემოს“, ქუჩას უბრუნდება და აღარ აპირებს პოლიტიკურ პარტიებში ყოფნას.

„[ნინო ბურჯანაძესთან] მე მქონდა კონფლიქტი იმასთან დაკავშირებით, რომ თითქოს მე გავმიშისტდი. საქმე ეხებოდა ერთადერთ რამეს. მე ვთქვი, რომ მიხეილ სააკაშვილი არის ფაქტორი ქართულ პოლიტიკაში. არის ხომ? ნეტა ვისი ბრალია?!... უპრეცედენტოა, რომ ხელისუფლებაში ნამყოფი პარტია არ გაქრა... პარტია ვერ შეინარჩუნა, ორად გაიყო, მაგრამ საქმე იმაშია, რომ ელექტორალურად გაიზარდა „ნაციონალური მოძრაობა“ და სააკაშვილი კერძოდ, იმიტომ, რომ ელექტორატი „ნაციონალური მოძრაობის“ არის სააკაშვილის ელექტორატი... როცა მე ეს ვთქვი, ატყდა ერთი ამბავი, რომ მიშისტი არისო. ცეკას დადგენილება ხომ მიიღო ბიძინა ივანიშვილმა, რომ ვინც არ გვეთანხმება და ჩვენ ჭკუაზე არ არის ყველა მიშისტია... მე მქონდა ქალბატონ ნინოსთან საუბარი და მას შევთავაზე ასეთი საკითხი, ტაქტიკური წმინდა, და მე მას შევთავაზე ასეთი რამ, რომ ჯობია მე გავიდე პარტიიდან, რადგან, მოგეხსენებათ, რომ ძალიან დიდი მასა არის ადამიანების, რომელთაც არ მოწონთ ის, რაც ქვეყნაში ხდება, მაგრამ არ აქვთ სურვილი არც ერთ პარტიაში შესვლის... ამიტომ ჩავთვალე, რომ ჩემი საქმიანობა უფრო საინტერესო და სარგებელს მოიტანს, თუ მე ასეთ ადამიანებთან მექნება კონტაქტი, პარტიას კი შეზღუდვები აქვს და ჩავთვალეთ, რომ ჯობია ასე, დავშორდეთ - დავშორდეთ, ის კი არა, ნინო ბურჯანაძეს მე ვიცნობ, ჯერ კიდევ საბჭოთა კავშირი ბიბინებდა, ბავშვობა ერთად გვაქვს გატარებული, მეგობრები ვართ, და არა მარტო მეგობრები, არამედ ნათელ-მირონია, ჩემი გოგოს ნათლიაა ნინო, ამიტომ ურთიერთობის პრობლემა არასდროს არ გვქონია. ხშირად ყოფილა სხვათა შორის, ბარიკადების სხვადასხვა მხარეს ვყოფილვართ, მაგრამ ადამიანური ურთიერთობა ჩემთვისაც და ნინოსთვისაც უპირველესია. დანარჩენი, მას აქვს დღის წესრიგი და მე მაქვს დღის წესრიგი. მე მინდა დავუბრუნდე ჩემს მშობლიურ გარემოს, ქუჩას და კიდევ ერთ რამესაც დავამატებ, რაც არ მითქვამს. მე აღარ ვაპირებ პოლიტიკურ პარტიებში ყოფნას. ჩათვალეთ, რომ საზოგადოებრივი აქტივისტი შეიძლება გავხდე და საზოგადოებრივი პარტიზანი, დანარჩენი რჩება ჩვეულებრივად. ურთიერთობები ქალბატონ ნინოსთან მე მექნება, რა თქმა უნდა, არანაკლები ინტენსივობით, მაგრამ მათ თავიანთი საქმე ექნებათ, მის პოლიტიკურ ორგანიზაციას, და მე ჩემი საქმე მექნება. ასე ჩავთალეთ მე და ქალბატონმა ნინომ“, განაცხადა გუბაზ სანიკიძემ.