მივიღეთ რამდენიმე მნიშვნელოვანი გადაწყვეტილება და მინდა მივაწოდო ინფორმაცია ტაქსის მძღოლებს... ჩვენი გადაწყვეტილებით, პირები, რომლებმაც გასული წლის 10 ოქტომბრის ჩათვლით გაიარეს ტაქსის რეგისტრაცია, შეცვალეს სატრანსპორტო საშუალებები და ახალი ნებართვის აღების მიუხედავად შეძლებენ მიმართონ კომპანიას და მიიღონ ღებვის, ფირის გადაკვრის და ქიმწმენდის ვაუჩერები 1 ივლისიდან 10 აგვისტოს ჩათვლით. ასევე მნიშვნელოვანი შეღავათი დავუშვით 11 ოქტომბრიდან 1 იანვრის ჩათვლით გაცემული ნებართვების მფლობელებზე. მათ ვაუჩერული პროგრამა საერთოდ არ ეხებოდათ, თუმცა, თუ ეს პირები ფლობენ არაუმეტეს 15 წლის ასაკის სატრანსპორტო საშუალებებს, ისინი ასევე შეძლებენ ვაუჩერების მიღებას. ანუ მათ თუ ჰყავთ 15 წელზე ახალი ავტომობილები, ექნებათ შესაძლებლობა მიმართონ ამ კომპანიას და რა თქმა უნდა, ექნებათ შესაძლებლობა შეღებვის, ფირის გადაკვრის და ქიმწმენდის ვაუჩერი მიიღონ , - განაცხადა, კახა კალაძემ თბილისის მუნიციპალიტეტის მერიის მთავრობის სხდომაზე. 

„ის ადამიანები, ვინც რჩებოდა უკმაყოფილო, შეიძლება ითქვას, რომ ამ ცვლილებებით და ამ რეგულაციების გამარტივებით ფაქტიურად 90 პროცენტს ეხება და ჩვენ ვაძლევთ ამის შესაძლებლობას იმიტომ, რომ ბევრია მსურველი, ბევრს ჰყავს ახალი ავტომობილი და ფიზიკურად ვერ ახერხებდნენ იმის გამო, რომ ვთქვათ, თუ ჰყავდა მარჯვენასაჭიანი ავტომობილი და შეცვალეს და ჰყავთ მარცხენასჭიანი ავტომობილი, ფიზიკურად ვერ ახერხებდა იმიტომ, რომ რეგულაცია არ უშვებდა. ჩვენ მივიღეთ ეს გადაწყვეტილება და აქვთ ამის შესაძლებლობა.

დღევანდელ სხდომაზე კახა კალაძემ საზოგადოებას კიდევ ერთი გადაწყვეტილება გააცნო.

„გარდა ამისა, ტაქსების რეფორმის ფარგლებში, თქვენ იცით, რომ ექსკლუზიურად A კატეგორიის ტაქსებისთვის გამოვყავით უფასო საპარკინგე ადგილები. გუშინ ტაქსის მფლობელების საინიციატივო ჯგუფთან შეხვედრისას მათ წარმოადგინეს დამატებით 14 მისამართი, 34 საპარკინგე ადგილზე. ჩვენ უზრუნველვყოფთ, რომ A კატეგორიის ლიცენზიის მქონდე ტაქსებისთვის აღნიშნულ მისამართებზე პარკინგი დაემატოს. საერთო ჯამში, ამ ეტაპზე, დედაქალაქის მასშტაბით, უკვე 437 საპარკინგე ადგილია გამოყოფილი“, - აღნიშნა კახა კალაძემ.

მისივე თქმით, დედაქალაქის მერია ტაქსის მძღოლების საინიციატივო ჯგუფთან აქტიურად თანამშრომლობს.

„ამ რეგულაციებით ეს რეფორმა არ სრულდება. მომდევნო თვეების განმავლობაში შემოვა სიახლეები და რა თქმა უნდა, სრულ ინმფორმაციას მივაწვდით, როგორც ტაქსის მძღოლებს, ასევე, მოსახლეობას. ჩვენი მთავარი ამოცანაა, რომ ზოგადად, ტრანსპორტი და განსაკუთრებით, საზოგადოებრივი ტრანსპორტი მოწესრიგებული იყოს“, - განაცხადა კახა კალაძემ.