სახელმწიფო კომპანიები წარმოადგენენ არაეფექტურობის, მიკერძოებული გარიგებისა და ნეპოტიზმის ბუდეს, აღნიშნული განცხადება ეკონომიკის ყოფილმა მინისტრმა, გიორგი ქობულიამ გააკეთა.

ქობულია, რომელიც დღეს პარლამენტში მივიდა, სახელმწიფო კომპანიებში არსებული კორუფციის პრობლემასა და ეკონომიკის გამოწვევებზე საუბრობს.

„ყველაზე მნიშვნელოვანი, რაც გვიჭირს, ეს არის სახელმწიფო სტრუქტურებში გადაწყვეტილებების დაბალი ხარისხი და დაუკმაყოფილებელი სისწრაფე. როგორც ცენტრალურ, ისე თვითმმართველ სტრუქტურებში ძალიან სუსტია ანალიტიკური შესაძლებლობები. უმეტესი გადაწყვეტილებები მოკლებულია ანალიტიკურ საფუძველს და მიიღება ემოციურ და ბოლომდე გაუაზრებელ საფუძველზე.

ცენტრალურ და განსაკუთრებით რეგიონულ მთავრობებში გადაწყვეტილებების გაუთავებელი გაჭიანურება და დაბლოკვა. ეს ეხება როგორც მიწების გადაცემას, ნებართვების გადაცემას, იყო რეგლამენტი, რომ 20 დღეში უნდა გაცემულიყო განსაზღვრული დოკუმენტი ინვესტორისთვის. ეს რეგლამენტი ნიშნავს, რომ 20 დღეში თუ არ გაიცა ეს დოკუმენტი, ოფიციალურად გაცემულად ითვლება. რატომღაც ეს რეგლამენტი გააუქმეს. ახლა ჩვენ ვხედავთ, რომ ის დოკუმენტები, რომელიც უნდა იყოს გაცემული 20 დღეში, გაიცემა 8 თვეში, 10 თვეში, 12 თვეში. ეს საკითხი არის მოსაგვარებელი და ასეთი რეგლამენტირება ძალიან დაგვეხმარება, რომ დისციპლინა დავამყაროთ ცენტრალურ და რეგიონულ მთავრობაში", განაცხადა გიორგი ქობულიამ.

ყოფილ მინისტრთან შეხვედრას ოპოზიცია და საპარლამენტო უმრავლესობის წევრები - ბიძინა გეგიძე, შოთა შალელაშვილი და ზაზა ხუციშვილი ესწრებიან.

შეხვედრა საკანონმდებლო ორგანოში ორ საათზე მეტია მიმდინარეობს.