გაერთიანებული ოპოზიციის ერთ-ერთი ლიდერი გიორგი ვაშაძე აცხადებს, რომ „ქართული ოცნება“ ზუგდიდის მერის რიგგარეშე არჩევნებზე ძალადობით ცდილობს უპირატესობის მოპოვებას, მაგრამ, როგორც მან ტელეკომპანია „TV პირველში“ ზუგდიდიდან პირდაპირ ეთერში ჩართვისას განაცხადა, ხალხის მხარდაჭერა მათ მხარეზეა და მათი კანდიდატი, სანდრა რულოვსი „დაახლოებით 55%-დან 60%-ამდე მიიღებს და ამით დამთავრდება ეს არჩევნები“.

„ემზადებიან პირდაპირი ძალადობით, რომ შევარდნენ და უბნები ჩაშალონ, როგორც ეს გააკეთეს 2016 წელს. კიდევ ერთხელ დაინახავს საქართველოს მოსახლეობა, რომ ჩვენ ხელისუფლებაში გვყავს არა პოლიტიკური ძალა, არამედ გვყავს მართლაც თავზეხელაღებული ყაჩაღები, ადამიანები, რომლებიც აყაჩაღებენ ამ ქვეყანას და ამაზეც საკადრის პასუხს მიიღებენ. ყველა ლიდერი აქ ვართ, ყველანი ერთად ვდგავართ, ყველა ვაპირებთ, რომ დავიცვათ თითოეული ხმა, მთავარია რომ ზუგდიდელები მოვიდნენ და არჩევანი გააკეთონ.

„იმდენად დიდია ჩვენი უპირატესობა ამ არჩევნებში, რომ ის მექანიზმები, რასაც ისინი ცდილობენ რომ გამოიყენონ, ეს მექანიზმები მათ არ ეყოფათ, არ უშველით და ჩვენ მოვიგებთ, მე მგონი აბსოლუტურად მშვიდად და წყნარად, დაახლოებით 55%-დან 60%-ამდე მიიღებს სანდრა რულოვსი და ამით დამთავრდება ეს არჩევნები. ხალხი დაიღალა იმ დანაშაულით, რასაც სჩადის „ქართული ოცნება“, განაცხადა გიორგი ვაშაძემ.