„ევროპული საქართველო“ და „თავისუფალი დემოკრატები“ მთაწმინდის ოლქში მათი დამკვირვებლებისთვის უფლებამოსილების განხორციელებაში ხელის შეშლის ფაქტებზე საუბრობენ. ცოტა ხნის წინ გამართულ ერთობლივ საგანგებო ბრიფინგზე ნინო გოგუაძემ და ირმა ნადირაშვილმა ცენტრალურ საარჩევნო კომისიასა და მის თავმჯდომარეს, თამარ ჟვანიას მოუწოდეს, შეასრულონ მოვალეობა და ნუ შეუშლიან ხელს დამკვირვებლებს თავიანთი უფლებამოსილების განხორციელებაში.

„ჩვენი დამკვირვებლები მოქმედებენ საარჩევნო კოდექსის 41-ე მუხლის ე პუნქტის შესაბამისად და ახორციელებენ ამ პუნქტით გათვალისწინებულ უფლებამოსილებებს. კერძოდ, ისინი ამოწმებენ პირადობის მოწმობებს რათა თავიდან იქნას აცილებული ხელისუფლების მიერ არჩევნების გაყალბება და კარუსელები. მინდა მივმართო ცესკო-ს და კერძოდ, თამარ ჟვანიას, რომ ფორმალურად მაინც შეასრულოს თავისი პირდაპირი ფუნქცია და ნუ შეუშლის ჩვენს დამკვირვებლებს თავისი უფლებამოსილების განხორციელებაში ხელს", განაცხადა ნინო გოგუაძემ.

ირმა ნადირაშვილის თქმით, ცესკო-მ და მისმა თავმჯდომარემ ნეიტრალური არბიტრის ფუნქცია უნდა შეასრულონ.

„მთაწმინდის ოლქში გამოჩნდნენ ცესკო-ს წარმომადგენლები, რომლებიც პირდაპირ აძლევენ მითითებებს საარჩევნო კომისიის თავმჯდომარეებს, რომ მათ პირადობის მოწმობების შემოწმების გარეშე შემოუშვან ადამიანები და მისცენ მათ ხმა. ეს არის პირდაპირი დარღვევა კანონის. ჩვენს კომისიის წევრებს აქვთ უფლება, მათი მოვლებაა, შეამოწმონ პირადობის მოწმობები. ამით გვინდა რომ ჩვენ თავიდან ავიცილოთ კარუსელები.... ამიტომ, მე კიდევ ერთხელ მოვუწოდებ თამარ ჟვანიას, ცესკო-ს, არ გაბედოს მონაწილეობის მიღება გაყალბებებში და შესაძლო კარუსელების დატრიალებაში. მან უნდა შეასრულოს ნეიტრალური არბიტრის ფუნქცია", განაცხადა ირმა ნადირაშვილმა ბრიფინგზე.