გაერთიანებული ოპოზიციის ზუგდიდის მერობის კანდიდატმა სანდრა რულოვსმა განმუხურში მხარდამჭერებთან შეხვედრისას გააფრთხილა ხელისუფლება, არ გამოაცხადოს „ქართული ოცნების“ კანდიდატი გამარჯვებულად პირველ ტურში, წინააღმდეგ შემთხვევაში ის საპროტესტო აქციებს მთელი საქართველოს მასშტაბით დაიწყებს და „შუშის სასახლემდე“ მივა.

რულოვსი აცხადებს, რომ მან პირველივე ტურში გაიმარჯვა.

„მე არ ვიცი რას აპირებენ მეორე ბანაკში. ჯერ ჩუმად არიან, თათბირობენ და თუ გამოაცხადებენ პირველ ტურში გამარჯვებას, ჩვენ ამას არ შევეგუებით არანაირად იმიტომ, რომ ეს არ შეესაბამება სიმართლეს. პირველი ტური მათ არ აქვთ მოგებული. ჩვენ გვაქვს მოგებული პირველი ტური და ჩვენ არ დავუშვებთ მეორე ტურს იმიტომ, რომ არ გვჭირდება. ჩვენ მოგებული გვაქვს პირნათლად და არ შევეგუებით. რატომ? იმიტომ, რომ ჩვენ არ გვინდა ჩვენი ქვეყანა დავკარგოთ. თუ ისინი მაინც პირველ ტურს გამოაცხადებენ, მაშინ, ვისაც უნდა გამომყვეს მთელ საქართველოში, იმიტომ რომ ეს არ არის მარტო ზუგდიდის ამბავი, მთელ საქართველოში, სოფელ-სოფელში, როგორც ზვიად გამსახურდია დადიოდა მაშინ რეფერენდუმის დროს, მეც მზადა ვარ ამ ქვეყნისთვის ამ ნაბიჯის გადასადგმელად და თითოეულ სოფელში, მე თუ არ გამომყვებიან თბილისამდე, აი, იმ შუშის სასახლემდე, აი, მე არ ვიცი, თქვენ იცით რა გელოდებათ? არ გირჩევთ, რომ პირველი ტური გამარჯვებული გამოაცხადოთ იმიტომ, რომ მე ამისთვის ვარ მზად, რა ფასადაც არ უნდა დამიჯდეს. თქვენ მე კიდევ არ მიცნობთ და ვინც მიცნობს, იცის, რომ მე არ ვხუმრობ“, თქვა რულოვსმა.