„ჩვენ გადავწყვიტეთ, რომ საპროტესტო ტალღა უნდა დაიწყოს ზუგდიდიდან, გადაედება მთელ ქვეყანას და დამთავრდება შუშის სასახლესთან, ივანიშვილის სასახლესთან", აცხადებს გაერთიანებული ოპოზიციის ზუგდიდის მერობის ყოფილი კანდიდატი სანდრა რულოვსი მას შემდეგ, რაც ცენტრალური საარჩევნო კომისიის წინასწარი მონაცემების მიხედვით, მან ზუგდიდში ამომრჩეველთა ხმების 42.84%, მისმა მოწინააღმდეგ „ქართული ოცნებიდან" კი, 54,18% მიიღო.

„ჩვენ მოვითხოვთ მის წასვლას ამ ქვეყნიდან, უნდა დაგვანებოს თავი იმიტომ, რომ მისი მოქმედება, მისი ე.წ. მმართველობა არის ყველასთვის ყველანაირ ზღვარს გადასული. ჩვენ ივანიშვილს აღარ უნდა ჩავატარებინოთ არჩევნები იმიტომ, რომ არ შეუძლია, არ ატარებს არჩევნებს. ამიტომ, ჩვენ ყველა უნდა დავირაზმოთ, მთელი ქვეყნის მასშტაბით არ დავტოვებ არცერთ ქუჩას, სოფელს, ყველანი ერთად ხელიხელჩაკიდებულები უნდა მივიდეთ თბილისამდე და მოვიშოროთ ივანიშვილი ამ ქვეყნიდან. მე ამ ბრძოლაში არ ვარ მარტო", განუცხადა სანდრა რულოვსმა ჟურნალისტებს.