ლეგენდარული ავსტრიელი, „ფორმულა 1“-ის სამგზის მსოფლიო ჩემპიონი, ნიკი ლაუდა 70 წლის ასაკში გარდაიცვალა.

ლაუდა, რომელმაც გასული წლის აგვისტოში ფილტვის გადანერგვის ოპერაცია გაიკეთა, ორშაბათს ძილში გარდაიცვალა.

მან პირველი ორი ტიტული, 1975 და 1977 წლებში, „ფერარისთან“ ერთად მოიგო, მესამე კი, 1984 წელს, „მაკლარენთან“ ერთად. ბევრისათვის დაუვიწყარია მისი დაბრუნება რბოლაში მას შემდეგ, რაც 1976 წელს გერმანიის „გრანდ პრიქსის“ რბოლაზე ავარიისას სერიოზული დამწვრობა მიიღო.

(ლაუდა, 1976 წლის მარტში გადაღებული ფოტო)

სპორტში კარიერის დასრულების შემდეგ იგი ავიახაზების სფეროში მეწარმე გახდა და ბოლოს პერიოდში „ფორმულა 1“-ის მერსედესის გუნდის არა-აღმასრულებელი თავმჯდომარე იყო.

„მისი, როგორც სპორტსმენის და მეწარმის მიღწევები არის და დარჩება დაუვიწყარი“, ნათქვამია ოჯახის მიერ გავრცელებულ განცხადებაში.