იაპონიაში სახელმწიფო ვიზიტად ჩასულმა ამერიკის შეერთებული შტატების პრეზიდენტმა, დონალდ ტრამპმა დააკნინა ჩრდილოეთ კორეული რაკეტების ბოლოდროინდელი გამოცდების შესახებ გამოხატულ წუხილებს, რაც ეროვნული უსაფრთოხების საკითხებში მისი მრჩევლის, ჯონ ბოლტონის მიერ გაკეთებულ განცხადებას ეწინააღმდეგება.

კვირას, იაპონიაში ჩასვლიდან მალევე, პრეზიდენტმა „თვითერზე“ რაკეტებს „მცირე იარაღები“ უწოდა, შაბათს კი, ჯონ ბოლტონმა თქვა, რომ გამოცდებმა ჩრდილოეთ კორეასთან დაკავშირებით გაეროს მიერ მიღებული რეზოლუციები დაარღვია.

ჩრდილოეთ კორეამ მცირე ზომის რაკეტები გაუშვა, რამაც შეაშფოთა ზოგი ადამიანი ჩემს გარემოცვაში და სხვებიც, მაგრამ არა მე. მე მაქვს რწმენა, რომ თავმჯდომარე კიმი შეასრულებს თავის პირობას, რომელიც მე მომცა“, განაცხადა ტრამპმა.

ტოკიოდან მოკლე სავალ მანძილზე, დონალდ ტრამპმა იაპონიის პრემიერ მინისტრ შინძო აბესთან გოლფის მოედანზე არაფორმალურ ვითარებაში გამართული შეხვედრისა და საუზმის შემდეგ განაცხადა, რომ მას სურს იაპონიასთან შეთანხმების მიღწევა, რაც მისი თქმით, ორ ქვეყანას შორის სავაჭრო დისბალანსთან არის დაკავშირებული.