სამწუხაროა ჩემთვის, რომ ბატონი შავგულიძე შეუერთდა მკვლელების - „ნაციონალური მოძრაობის“ და „ევროპული საქართველოს“ კორპორაციას, - განაცხადა „ქართული ოცნების“ პოლიტიკურმა მდივანმა, ირაკლი ღარიბაშვილმა ტელეკომპანია „იმედთან“ საუბრისას.

ღარიბაშვილის თქმით, ძალიან ბევრი ბრალდება არის „ევროპული საქართველოს“ ლიდერების - ბოკერიას, ბაქრაძის და უგულავას მიმართ, რომლებიც იყვნენ „პირდაპირ თანამონაწილენი ძალიან მძიმე დანაშაულებების“.

„სამწუხაროა ჩემთვის, რომ ბატონი შავგულიძე შეუერთდა, ასე ვთქვათ, მკვლელების კორპორაციას. ჩემთვის „ნაცმოძრაობა“ და მათი ლიდერები, მათი ლიდერებისგან შექმნილი პოლიტიკური კლუბი ასოცირდება მკვლელების კორპორაციასთან. მე ამის თქმას არ მოვერიდები. რატომ? „ევროპული საქართველო“ ჩემთვის არის იგივე „ნაცმოძრაობის“, ასე ვთქვათ, დანაყოფი. ჩემი აზრით, ეს იყო ტექნიკური გაყოფა, ფრონტი გაშალეს, თქვეს, რომ აი, ჩვენ, სისხლიან საქმეებში არ ვმონაწილეობდით, თუმცა მე მათ შევახსენებ, ძალიან ბევრი ბრალდება არის თუნდაც „ევროპული საქართველოს“ ლიდერების მიმართ, თუნდაც ბოკერიას მიმართ, ბაქრაძის მიმართ, უგულავა - ამ ადამიანებმა მოიხადეს სასჯელი და იყვნენ პირდაპირ თანამონაწილენი ძალიან მძიმე დანაშაულებების. ეს მისი არჩევანია. ჩემთვის უბრალოდ გაუგებარია მისი მოტივაცია. აი, რამ განაპირობა ის, რომ ბატონი შავგულიძე შეუერთდა ბატონ სააკაშვილს და შემდეგ მისგან ღებულობს მადლობებს“, განაცხადა ღარიბაშვილმა დაამატა, რომ „ნაციონალურმა მოძრაობამ“ და სანდრა რულოვსმა დაანონსეს, რომ არეულობით მივიდოდნენ ბიძინა ივანიშვილის სასახლესთან, თუმცა მისი თქმით, „ნებისმიერი ადამიანი, ვინც გაბედავს, ჩვენი სახელმწიფოს, ჩვენი ხალხის წინააღმდეგ რაიმე ანტიკონსტიტუციურ ქმედებას, იქნება უმკაცრესად დასჯილი“.