საქართველოს პარლამენტის ვიცე-სპიკერის, ქართული ოცნების“ ერთ-ერთი ლიდერის, გიორგი ვოლსკის შეფასებით, უკრაინის პრეზიდენტის, ვლადიმერ ზელენსკის გადაწყვეტილება, საქართველოს ყოფილი პრეზიდენტის, მიხეილ სააკაშვილისთვის უკრაინის მოქალაქეობის აღდგენის თაობაზე „გულდასაწყვეტია“, მაგრამ, „საქართველო-უკრაინის ურთიერთობები გაცილებით უფრო მნიშვნელოვანი და მასშტაბურია, ვიდრე ის, თუ სააკაშვილის მიმართ რა გადაწყვეტილებას მიიღებენ“.

ვოლსკი აცხადებს, რომ მიხეილ სააკაშვილი ავანტიურისტია, რომელიც ყველა ნაბიჯზე, ყველა საკითხთან დაკავშირებით იტყუება.

„თავს შევიკავებდი ზელენსკის გადაწყვეტილებების შეფასებებისგან, რადგან ჩვენ და უკრაინას ერთად ძალიან ბევრი გვაქვს გასაკეთებელი. ძალიან მნიშვნელოვანი და სერიოზული ნაბიჯები გვაქვს გადასადგმელი ყველა მიმართულებით, მათ შორის, ამ დაძაბულ სიტუაციაში. აქედან გამომდინარე, მოკავშირეობის თემა ჩვენთვის პრიორიტეტულია.

რაც შეეხება თვითონ მიხეილ სააკაშვილს, ვფიქრობ, რომ ავანტიურისტია, მნიშვნელოვნად დაუპირისპირდა დასავლეთის ინტერესებს, როცა საქართველოს პრეზიდენტი იყო, მათ შორის 2008 წლის წინა პერიოდში. მან ჩვენი პარტნიორების რეკომენდაციების ყველანაირი იგნორირება მოახდინა. ამასთანავე, სააკაშვილი ადამიანია, რომელიც ყველა ნაბიჯზე, ყველა საკითხთან დაკავშირებით იტყუება. აქედან გამომდინარე, უკრაინისათვის მისი გარკვეულ საქმიანობაში ჩართვა სწორი არ იქნება, დამაზიანებელი იქნება.

ზელენსკის გადაწყვეტილება გულდასაწყვეტია. მაგრამ, როდესაც სასწორზე დებ ამ ორ საკითხს გლობალური მასშტაბით, საქართველო-უკრაინის ურთიერთობები გაცილებით უფრო მნიშვნელოვანი და მასშტაბურია, ვიდრე ის, თუ სააკაშვილის მიმართ რა გადაწყვეტილებას მიიღებენ. მოულოდნელი გადაწყვეტილება არ ყოფილა, რადგან ამის შესახებ განცხადება გაკეთებული იყო და ეს [ზელენსკიმ] რამდენჯერმე თქვა“, განაცხადა გიორგი ვოლსკიმ.