ისრაელის კანონმდებლებმა პარლამენტის დაშლას დაუჭირეს მხარი მას შემდეგ, რაც პრემიერ მინისტრმა ბენიამინ ნეთანიაჰუმ გასულ თვეს ჩატარებული საპარლამენტო არჩევნების შემდეგ ვერ შეძლო ახალი მემარჯვენე ფრთის კოალიციური მთავრობის ფორმირების შესახებ შეთანხმების მიღწევა.

მას შემდეგ, რაც ოთხშაბათს, მთავრობის ფორმირებისთვის განკუთვნილი ბოლო ვადა ადგილობრივი დროით შუაღამის 12:00 საათზე ამოიწურა, დეპუტატებმა - 74 ხმით 45-ის წინააღმდეგ - ქნესეთის დაშლას მისცეს ხმა. ახალი რიგგარეშე არჩევნები 17 სექტემბერს ჩატარდება.

ეს პირველი შემთხვევაა ისრაელის ისტორიაში, როდესაც პრემიერ მინისტრის პოსტზე დანიშნული პირის მცდელობა კოალიციის ფორმირებაზე წარუმატებელი აღმოჩნდა.

რატომ აღმოჩნდა კოალიციის შესახებ მოლაპარაკებები წარუმატებელი?

ნეთანიაჰუმ კოალიციური მთავრობის ჩამოყალიბებაზე მოლაპარაკებები მას შემდეგ დაიწყო, რაც აპრილში გამართულ საპარლამენტო არჩევნებში მისმა „ლიკუდის პარტიამ“ 120-ადგილიან ქნესეთში 35 მანდატი მიიღო და იმ შემთხვევაში თუკი იგი მოახერხებდა კოალიციური მთავრობის ფორმირებას, მეხუთე ვადით გახდებოდა პრემიერ მინისტრი, მაგრამ მისი მცდელობა წარუმატებელი აღმოჩნდა, რადგან ვერ შეძლო შეთანხმების მიღწევა ყოფილ თავდაცვის მინისტრთან, ნაციონალისტური პარტიის „ბეითენუს“ ლიდერ ავიგდორ ლიბერმანთან, რომლის მხარდაჭერაც არსებითი აღმოჩნდა. უთანხმოების მიზეზი კი ის გახდა, რომ ლიბერმანმა ულტრა-ორთოდოქს ებრაულ პარტიებთან მოკავშირეობაზე წამოაყენა პირობა.

პარლამენტში გამართული კენჭისყრის შემდეგ ნეთანიაჰუმ ჟურნალისტებს განუცხადა: „ჩვენ მძაფრ, მკაფიო საარჩევნო კამპანიას წარვმართავთ, რაც გამარჯვებას მოგვიტანს. ჩვენ გავიმარჯვებთ, ჩვენ გავიმარჯვებთ და საზოგადოება გაიმარჯვებს“.